Кэскиллээх ыччаттардаах Хатыыга

Ньурба улууһугар Хатыы сэлиэнньэтигэр Бырабыыталыстыба отчуота бэрт сэргэхтик буолан ааста.

Манна, хайа да нэһилиэккэ тэҥнээтэххэ, нэһилиэк олоҕун укулаатын ыччат дьон тутан олорор (баһылык Леонид Александрович Николаев). Аҥаардас агро-оскуолаҕа 11 холостуой учуутал уол үлэлиир эбит. Онон олохтоохтор кийиит кыргыттары аҕаларга, эдэр ыччаты олохсутарга 1979 сыллаахха тутуллубут эргэ кулууптара өрөмүөннэнэригэр уонна сөптөөх олорор усулуобуйаланы тэрийэргэ, сылы эргиччи айан суола (сайын өрүһүнэн эрэ сылдьаллар) баар буоларыгар, оҕо уһуйаана өрөмүөннэнэригэр, балыыһа боппуруоһа быһаарылларыгар баҕа санааларын тириэртилэр. Ону сэргэ сайын иһэр уу боппуруоһун, уу таһар массыына атыылаһарга үп-харчы тиийбэтин, суол оҥоһуутун уо.д. а. туруорустулар.

Оробуочай бөлөх салайааччыта, СӨ Бырабыыталыстыбатын бэрэссэдээтэлин солбуйааччы Георгий Степанов ыччаттар инникигэ былааннара кэскиллээҕин бэлиэтээтэ уонна араас граннарга киирсэллэригэр сүбэлээтэ.

Хатыы агро-оскуолатын дириэктэрэ Владимир Гаврильевич Тимофеев 50-ча сүөһүлээх дьоҕус хотоннонуохтарын баҕаралларын биллэрдэ. Олохтоохтор өрөспүүбүлүкэҕэ сайдыы барарын, ол эрэн кыра нэһилиэктэри умнубаттарыгар көрдөстүлэр.

Биирдиилээн дьон Социальнай пуонда отделениетын управляющайын солбуйааччы Татьяна Афанасьевна Ивановалыын, СӨ Тутууга министиэристибэтин иһинэн «Олорор дьиэ бырагырааматын сайыннарыы киинэ» АНО дириэктэрэ Мария Григорьевна Алексеевалыын уо. д. а. тустаах кыһалҕаларын үллэһиннилэр, сүбэ-ама ыллылар