Көспүтүҥ туһунан байаҥкамаакка биллэрбэтэх буоллаххына, ыстарааптыыр сокуон барыла оҥоһулунна

Үс ыйтан ордук болдьох иһигэр саҥа сиргэ көспүтүн туһунан байыаннай комиссариакка биллэрбэтэх киһи административнай эппиэтинэскэ тардыллан, 10-тан 20 тыһыынча солкуобайга диэри ыстарааптаныан сөп.

Госдуума Судаарыстыбаннай тутууга уонна сокуону оҥорууга кэмитиэтэ бу сокуон барылын бигэргэттэ, докумуон бастакы ааҕыытын кэтэһэр, диэн суруйар “Российская газета”.

Билигин итинник кэһии иһин ыстараап кээмэйэ бииртэн биэс тыһыынча солкуобайга диэри халбаҥныыр. Сокуон барылын ааптардара этэллэринэн, билиҥҥи кээмэй аһара кыра буолан, дьон аахайбаттар. Манан сибээстээн, маннык буруйу оҥоруу иһин ыстараап сууматын биллэ улаатыннарарга диэн этии киирбит.

Сокуон барыла ылыллыыта гражданнар байыаннай учуотунан эбэһээтэлистибэлэрин толороллоругар эппиэтинэстэрин үрдэтиэҕэ диэн быһаарыылаах сурукка этиллэр.