Кэтээн көрөр лүөччүк идэтигэр үөрэнии саҕаланна

Саха сиригэр курсаннары сүүмэрдээн, бүгүн саҥа үөрэх күнэ саҕаланна диэн СӨ Экологияҕа, айылҕаны туһаныыга уонна ойуур хаһаайыстыбатыгар министиэристибэ иһитиннэрэр.

Кэтээн көрөөччү лүөччүктэри бэлэмнээһин куурус эрэ буолбатах, бу «анал» исписэлииһи бэлэмнээн таһаарыы буолар. Тоҕо диэтэххэ, бу ураты идэни университеттарга үөрэппэттэр, “Авиалесоохрана” систиэмэтигэр эрэ бэлэмнииллэр.

Бастаан курсаннар теорияны үөрэтэллэр уонна тренажердарга дьарыктаналлар. Саҥа исписэлиистэр маршрутизацияны, картографияны уонна навигацияны баһылыахтаахтар, ол эрэ кэннэ дьиҥнээх көтүүлэргэ барыахтара.

Кинилэр ойууру үөһэттэн көрөн, уот туруутун сабаҕалыахтаахтар уонна түргэнник быһаарыы ылыныахтаахтар. Кинилэри бэлэмнээһин дойдуга ойуур харыстабылын бүтүн систиэмэтин тирэҕэ буолар. Бастаан үөрэх ыраахтан олорон ыытыллыа, оттон алтынньы 8 күнүттэн Пушкино куоракка салҕаныа.

Курсаннартан биирдэстэрэ Виктор Филиппов ойуур баһаарынайыттан парашютнай-десантнай баһаарынай сулууспа инструкторыгар тиийэ үүммүтэ. Бүгүҥҥү күҥҥэ кини 50-н тахсата парашютунан ыстанан турар.

Билигин кини уота саҥа сыалга-сорукка аҕалла: кини уоту умуруорар эрэ буолбакка, үөһэттэн көрөн, быһыыны-майгыны эрдэттэн билиэн баҕарар.

— Бастаан 2017 сылтан Ньурбатааҕы авиация салаатыгар сезоннай баһаарынайынан үлэлээбитим. Быйылгыттан Дьокуускайдааҕы баазаҕа көһөрүллүбүтүм. Бу баһаар сезонугар Таатта, Дьааҥы, Бүлүү уонна Мииринэй улуустарыгар сырыттым. Онтон билигин ойуур баһаарын умуруоруу үлэтин саҥа өрүтүн баһылыахтаахпын. Мин уруккуттан туох эрэ саҥаны, үөрэнэргэ улахан интэриэстээхпин. Үөрэх үчүгэйдик барыа, таһаарыылаах буолуо дии саныыбын. Миигин кытта өрөспүүбүлүкэбит араас улуустарыттан биир идэлээхтэрим үөрэниэхтэрэ, Ньурба, Сунтаар, Батаҕай уонна Зырянка авиаэтэрээттэрин десантниктара-баһаарынайдара уонна парашютист-баһаарынайдара.

Быйыл Эдьигээҥҥэ уонна Орто Халымаҕа саҥа авиаэтэрээти аһарга үлэ барар. Онно хас биирдиилэригэр икки кэтээн көрөөччү лүөччүгү бэлэмнииллэр.