Көтөр кириибин утары миэрэлэри күүһүрдэллэр

Сергей Местников «Противоэпизоотическай хамыыһыйа» мунньаҕын салайан ыытта. Манна бэтэринээрийэ өттүттэн куттала суох буолуу боппуруостарын көрдүлэр.

Кини эппитинэн, Саха сиригэр көтөр кириибин тарҕаныыта суох, ол эрээри, ыарыыны тарҕатыыны бохсор миэрэлэри эрдэттэн күүһүрдүөххэ наада.

Саха сирин уонна Амур уобалаһын «Россельхознадзор» управлениеларын үлэһиттэрэ көтөр кириибин вируһа тарҕамматын сэрэтэр үлэ туһунан кэпсээтилэр.

Сыл аайы кэтээн көрүү үлэтэ ыытыллар. 2024 сылга 6496 чинчийиини ыыппыттар, ол иһигэр, дьиэ көтөрүгэр — 5588, дьиикэй көтөргө — 801, киһи аттыгар олорор дьиикэй көтөргө — 107. Түмүгэр көтөр кириибин вируһа булуллубатах.

Ааспыт сылга бырамыысыланнай тэрилтэлэргэ 11,6 тыһыынча дьиэ көтөрүгэр быһыы бэриллибит.

2025 сылга 7745 чинчийиини ыытар былаан баар. 15 тыһыынча көтөргө быһыы бэриллиэхтээх. Көтөрү иитэр тэрилтэлэргэ бэтэринээринэй  быраабылалары тутуһуу ирдэбилин хонтуруоллууллар.

Мунньах түмүгүнэн, көтөрү иитэр хаһаайыстыбаларга санитарнай үлэни күүһүрдэргэ, экология министиэристибэтигэр өлбүт көтөрдөрү буллахха, булгуччу чинчийиини ыытарга соруктары туруордулар.