Кибер-түөкүттэр баайдарын былдьыыр сокуон таҕыста

Кэнники кэмҥэ интэриниэтинэн, төлөпүөнүнэн түөкүннээһин наһаа элбээтэ. Ол иһигэр, түөкүттэр албыннарыгар киирэн, дьон баантан кирэдьиит ыла-ыла ыыталлар. Бу манна бааннар тоҕо атын киһи счетугар кирэдьиит харчытын ыыталлар?

Бэс ыйын 13 күнүгэр бэрэсидьиэн  Владимир Путин көмпүүтэр түөкүттэрин баайдарын-дуолларын былдьаан ылар туһунан сокуоҥҥа илии баттаата. Ону тэҥэ, бу сокуон кибератаака түмүгэр хоромньуну таһаарбыт түөкүттэргэ, араас “вирустаах” бырагыраамалары оҥорор, тарҕатар дьоҥҥо, киһи тус дааннайдарын харайыы ирдэбилин кэһээччилэргэ эмиэ сыһыаннаах.

Бу иннинэ Госдуума көмпүүтэр түөкүттэриттэн дьону көмүскүүр сокуону ылыммыта.

Сокуон бааннары уонна төлүүр систиэмэлэри килийиэн сөбүлэҥэ баарын да үрдүнэн, саарбах төлөбүрдэри 1-2 күҥҥэ тохтотор туһунан ирдэбиллээх. Түөкүттэр дьону албыннаан, баантан кирэдьиит ылалларыгар күһэйэллэр. Ордук сааһырбыт дьон маннык албыҥҥа киирэн биэрэллэр.

—— Сокуон ирдэбилинэн, бааннар уонна да атын оператордар саарбах төлөбүрдэри сиһилии бэрэбиэркэлиир уонна миэрэ ылар эбээһинэстэнэллэр. Маннык ирдэбили тутуспат бааннар дьоҥҥо харчыларын төнүннэриэхтээхтэр, — диэн Госдуума спикерэ Вячеслав Володин бэлиэтээтэ.