Киэһээҥҥи аһылык суоҕун иһин дьахтарын кырбаабыт

Арыгылаан баран бииргэ олорор дьахтарын кырбаабыт Мииринэй олохтооҕо холуобунай дьыалаҕа эрилиннэ. Бу туһунан ИДьМ пресс-сулууспата иһитиннэрдэ.

Мииринэйгэ дьахтардаах эр киһи икки ардыларыгар тахсыбыт иирсээн түмүгэр, 39 саастаах дьахтар госпитализацияламмыт.

Урут хаста даҕаны холуобунай эппиэтинэскэ тардылла сылдьыбыт  42 саастаах уорбаланааччы кэпсээбитинэн,  киэһээҥҥи аһылык суоҕуттан сылтаан кини дьахтарга айдаарбыт. Онуоха дьахтара үөҕэн барбыт.   Эр киһи кыыһыран дьахтары хаста даҕаны төбөҕө охсубут.  Кэлин эмсэҕэлээччи туруга мөлтөөбүтүн көрөн, эр киһи билэр дьахтарыгар эрийбит. Ону дьахтар суһал көмөҕө эрийбит. Бэлиэтээн эттэххэ, быһылаан тахсар күнүгэр дьахтардаах эр киһи итирик туруктаах эбиттэр.

Билигин эр киһиэхэ РФ Холуобунай кодексын 111 ыст. 1 ч.  («Умышленное причинение тяжкого вреда здоровью») холуобунай дьыала көбүтүлүннэ.