Киэн туттабыт! Сүгүрүйэбит!

Улуу Кыайыы 80 сылынан Аҕа дойду уоттаах сэриитин толоонугар хорсун быһыыны көрдөрбүт, Кыайыыга кылааттарын киллэрсибит буойуттарбыт ааттарын үйэтитэр билиҥҥи көлүөнэ тулхадыйбат иэстээхпит.

Суотту нэһилиэгиттэн Аҕа дойдуну көмүскүүр сэриигэ 175 киһи кыттыыны ылбыта. Кыргыс толоонуттан 114 киһи эргиллибэтэҕэ. Сэрии кэнниттэн Суоттуга олохсуйбут бэтэрээннэри аахтахха нэһилиэк дьоно 189 киһи Улуу Кыайыыны саа саадах тутан уһансыбыта.

Уһулуччу хорсун быһыыны көрдөрөн уордьаннарынан наҕараадаламмыт буойуттарбытынан буолаллар 182-с штурмовой дивизия 64 -с штурмовой авиаполк стрелога, «Хорсунун иһин» мэтээл, «Кыһыл Сулус», «Албан аат III -с ст.», «Аҕа дойду Улуу сэриитэ II-с ст.» уордьаннар кавалердара, эдэркээн сааһыгар Илиҥҥи Пруссияҕа сырдык тыына быстыбыт Колесов Иннокентий Дмитриевич. 3-с гвардейскай механизированнай биригээдэ, 1-гы механизированнай корпус, III-с Украинскай фронт сержана «Кыһыл Сулус» уордьан кавалера Бочкарев Егор Иннокентьевич. I-кы Украинскай фронт 120-с минометнай полкатын связиһа, Берлины ылыы кыттыылааҕа, «Кыһыл Сулус» уордьан кавалера Жирков Роман Петрович. «Албан Аат III-с ст.» уордьан кавалера Степанов Гаврил Алексеевич. «Албан Аат II-с ст.» кавалера Титов Константин Семенович, «Албан Аат II-с ст.» кавалера Неустроев Ефим Алексеевич.
Суоттуттан Аҕа дойду Улуу сэриитигэр офицер званиелаах икки киһи баар. Бастакынан ааттыыбыт политрук, старшай лейтенант Тимофей Тимофеевич Татариновы. Кини «Хорсунун иһин» мэтээлинэн наҕараадаламмыта. 1943 с. Украина сиригэр өстөөх буулдьатыттан кыргыс толоонугар охтубута. Иккис киһибит Кривогорницын Егор Семенович. 1941 с. дойдутуттан Саһылыкаан нэһилиэгиттэн ыҥырыллан сэриигэ барбыта. II- с. Прибалтийскай фронт 514-с танковай батальонугар аатырбыт Т 34 танк экипаһын састаабыгар сулууспалаабыта. Старай Русса иһин кыргыһыыга улаханнык бааһыран госпиталга киирбитэ. 1944 с. Томскайдааҕы артиллерийскай училищеҕа үөрэххэ ыыппыттара. 1945 с. училищены бүтэрэн младшай лейтенант званиетын ылбыта уонна илиҥҥи фроҥҥа артиллерийскай взвод командирынан Японияны утары сэриигэ кыттыыны ылбыта. 1945-47 сс. 202-с артбиригээдэҕэ ситиһиилээхтик сулууспалаан баран дойдутугар эргиллибитэ.

Ким да умнуллубат, туох да умнуллубат. Аҕа көлүөнэбит Албан аата-суола үйэлэри уҥуордаан кэлэр кэнэҕэски ыччакка кэпсэнэ туруохтун!

Раиса Черкашина,

Суотту модельнай бибилэтиэкэтэ.

Хаартыскалар Р.Черкашина тиксэриилэрэ