Үтүө холобур буолар дьиэ кэргэн

Сана үйэҕэ эргиэн үлэтигэр саҥа саҕалааһыннар кэрэхсэбиллээхтэр.

Урукку кэмҥэ атыы-тутуу, эргиэн эйгэтигэр «Холбос» биир тэрилтэтэ барытын хааччыйан олороро. 1990 сылларга нэһилиэкпит эдэр ыччата урбааҥҥа ылсыбыта. Билигин да онон дьарыктана, үлэлии сылдьаллара хайҕаллаах, махталлаах.
Биир оннук киэн туттар дьоммутунан Атамай нэһилиэгин элбэх оҕолоох ыаллара Юлия, Дмитрий Филипповтар буолаллар.

Юлия, Дмитрий тыа сирин дьоно туохха наадыйалларыгар болҕомтолорун уураллар. Ол курдук, ас-үөл атыылыыр маҕаһыыннаахтар.

Филипповтар 2012 сылтан бу үлэлэригэр ылсыбыттара. Урбаан үлэтэ туһугар эмиэ уустуктардаах буолара биллэр. Кинилэр онтон чаҕыйбакка, күүскэ ылсан үлэлээннэр элбэҕи ситистилэр. 2017 сыллаахха дьоҕус бэкээринэ аспыттара. Онон олохтоохтору сибиэһэй килиэбинэн хааччыйаллар. Ону таһынан бурдук ас арааһын астыыллар. Үлэлэрин салгыы сайыннаран, 2021 сылтан «Ыраас уунан» дьарыктаналлар. Эдэр дьон үлэлэригэр саҥаны, сонуну тобулаллар. Ол курдук, 2023 сыллаахха «Астык» диэн маҕаһыыннаммыттара.

Оҕолоругар бэйэлэрэ үтүө холобур буолаллар. Ол курдук, оҕолорун кыраларыттан батыһыннара сылдьан үлэҕэ-хамнаска такайаллар. Бөһүөлэктэн 1.5 көс тэйиччи баар Тумааскай диэн өтөхтөрүгэр сайын аайы төрөппүттэрин, оҕолорун, аймахтарын кытары сылгыларыгар оттууллар. Быыстарыгар бары айылҕаҕа сылдьан сыннаналлар, сир астыыллар. Эйэлээх дьиэ кэргэнинэн биһиги, дойдулаахтара, киэн туттабыт.

Ыарахантан толлубакка нэһилиэкпит эдэр ыччата дойдуларын сайыннарса туралларыгар эрэнэбит.

Валентина Яковлева,

Атамай, Горнай.

Хаартыскаҕа ааптар түһэриитэ