Киев дроннарынан Кириэмилгэ охсууну оҥоро сатаата

Украина сэрэдэ үүнэр түүнүгэр пилота суох көтөр тэриллэринэн (дроннарынан) Кириэмилгэ кимэн көрөргө холонон көрдө.

Ол туһунан дойду Бэрэсидьиэнин дьаһалтата биллэрдэ диэн «Новости» РИА судаарыстыба баһылыгын   пресс-сулууспатыгар сигэнэн иһитиннэрдэ.

«Бөлүүн түүн икки пилота суох көтөр аппараат РФ Бэрэсидьиэнин Кириэмиллээҕи резиденциятыгар кимэн киирэн көрдүлэр. Ол эрээри байыаннай уонна анал суһал сулууспалар бириэмэтигэр радиолокационнай систиэмэни туһанан сөптөөх дьайыыны оҥороннор, аппарааттары туораттылар», — диэн бэлиэтииллэр. Кимэн киирии кэмигэр эчэйии, өлүү-сүтүү тахсыбатах.

Бэрэсидьиэн  пресс-сэкирэтээрэ Дмитрий Песков эппитинэн, бу кэмҥэ Владимир Путин Кириэмилгэ суох кэмэ эбит. Билиҥҥитэ дойду баһылыга урукку эрэсииминэн үлэлиир. Ыам ыйын 9 күнүгэр Улуу Кыайыы бырааһынньыгын параата, былааннаммытын курдук, Кыһыл болуоссакка ыытылларын эттилэр.

Бу быһылааны былааннаммыт террористическай аахсыйаны оҥорорго холонон көрүү уонна Улуу Кыайыы күнүн иннинэ дойду Бэрэсидьиэнигэр саба түһүүгэ сорунуу быһыытынан сыаналаатылар.