Киһиэхэ кыра да болҕомто наадатын өйдүүллэр

Байыаннай эпэрээссийэҕэ сылдьар дьонноох ыалга Сайсары уокуругун управлениета тиһигин быспакка көмөлөһөр. Куорат үрдүнэн хас уокурук аайы араас телеграм-ханаалга кыһалҕаларын быһаарсар бөлөхтөөхтөр.

Сайсары уокуругар 196 дьиэ кэргэн учуокка турар, көмөнү бары толору туһанан олороллор. Ол курдук, психологическай көмө оҥоһуллар, юристар сүбэ-ама биэрэллэр, ону таһынан култуурунай тэрээһиннэргэ сырытыннараллар. Автодорожнай техникум волонтердара чааһынай сектордарга хаар таһыытыгар, уу хачайдааһыныгар үлэлээтилэр.
Бэҕэһээ, ыам ыйын 2 күнүгэр, байыаннай эпэрээссийэҕэ сылдьар дьонноох дьиэ кэргэттэргэ уокурук көмөтүн — бырааһынньыктааҕы аһы-үөлү Сайсары уокурук салайааччытын социальнай боппуруостарга солбуйааччы, бэрт сэмэй, сайаҕас Саргылана Мироновна Антонова үөрэ-көтө туттартаата. Киһиэхэ кыра да болҕомто наадатын өйдөөн, уокурук үлэһиттэрэ истиҥник сыһыаннаһаллара ийэлэргэ, аҕаларга, кэргэттэригэр эрэли үөскэтэр.

Ньургуйаана СКРЯБИНА