Киһини өлөрө сатааһыҥҥа буруйдааҕынан билиниллибит эр киһи бириигэбэрэ таҕыста

Саха сиринээҕи Силиэстийэлиир кэмитиэтин управлениетын хомуйбут дакаастабылынан Дьокуускай куорат 41 саастаах олохтооҕо киһини өлөрө сатаабыт буруйдааҕынан ааҕылынна.

Силиэстийэ уонна суут быһаарбытынан, кулун тутар 18 күнүгэр буруйданааччы Дьокуускай куоракка Кржижановскай уулуссаҕа олорор дьиэтин төрдүс этээһин кыбартыыратыгар арыгы испит. Бу туһунан Саха сиринээҕи Силиэстийэлиир кэмитиэтин пресс-сулууспата суруйар.

Арыгы иһэн баран кыыһырсыы тахсыбыт, өһүөннээх санаатынан ойоҕор илиитин көтөхпүт, онтон салгыы балкон аһаҕас түннүгүнэн түҥнэри аспыт. Дьахтар төрдүс этээстэн сууллан элбэх эчэйиини, уҥуох тостууларын ылбыт. Тахсыбыт быһылааны көрбүт ааһан иһэр киһи кэмигэр мэдиссиинэ суһал көмөтүн  биригээдэтин ыҥырбыт. Силиэстийэ хаамыытыгар дакаастыыр баазаны бөҕөргөтүүгэ уонна наадалаах силиэстийэлиир дьайыылар барыта ыытылынна. Сууттанааччы буруйдааҕынан билинниллэн,  6 сылга көҥүлэ быһыллан хаайылынна.