Буруйдаах өлбүт киһи аймахтарыгар 1,3 мөл. солк. тахсаны төлүөҕэ

Өймөкөөн улууһугар борокуратуура ирдэбилинэн, киһини өлөрүүгэ сууттаммыт буруйдаах өлбүт киһи аймахтарыгар 1,3 мөлүйүөнтэн тахса солкуобайы төлүөҕэ.

Өрөспүүбүлүкэ борокуратууратын пресс-сулууспата иһитиннэрэринэн, бэрэбиэркэ олохтоох киһи сайабылыанньатынан ыытыллыбыт.

Силиэстийэҕэ быһаарыллыбытынан, 2024 сыл сэтинньитигэр Уус Ньара бөһүөлэгэр сайабылыанньалаах бииргэ төрөөбүт убайа өлөрүллүбүт. Буруйдаах киһини суут 9 сылга көҥүлүн быһан, кытаанах эрэсиимнээх холуонньаҕа ыытарга уураахтаабыт. Борокуруор ирдэбилинэн суутунан буруйдаахтан уопсайа 1,3 мөлүйүөнтэн тахса солкуобай суумалаах моральнай уонна материальнай хоромньуну толуйтарарга быһаарыы ылылынна. Өймөкөөн улууһун  борокуратуурата суут быһаарыытын хонтуруолга ылла.