Киһини түҥнэри көппүт эр киһи биэс сылга көҥүлэ быһылынна

Дьокуускай куоракка суол быһылааныгар киһи өлбүтүнэн холуобунай дьыалаҕа бириигэбэр таҕыста.

СӨ Борокуратууратын иһитиннэриитинэн, Дьокуускай куорат борокуратуурата 40 саастаах олохтооҕор холуобунай дьыалатыгар судаарыстыбаннай буруйдааһынын өйөөтө. Кини РФ ХК 4 ч. 264 ыст. буруйданна.

Суукка буруйданааччы былырыын «Hyundai Avante» массыынанан итирик туруктаах сылдьан Ленин проспегар эр киһини түҥнэри көппүтэ быһаарылынна. Суол быһылаанын түмүгэр эр киһи ылбыт эчэйиититтэн өлбүт.

Суут кэмигэр буруйдаах эр киһи буруйун сорҕотун эрэ билиммит. Суут судаарыстыбаннай буруйдааччы этиитин учуоттаан, эр киһини холуонньа поселениетыгар 5 сыл 6 ый болдьоххо хаайарга уураахтаата. Бириигэбэр сокуоннай күүһүгэр киирэ илик.