Киһини уоруу, массыынаны күрэтии, өлөрүүнэн куттааһын…

Ленскэй улууһун борокуруора икки олохтоох эр дьоҥҥо буруйдуур түмүгү бигэргэттэ. Кинилэр киһини уорууга, массыынаны күрэтиигэ, өлөрүүнэн куттааһыҥҥа уонна сокуону кэһэн сэби-сэбиргэли эргиниигэ буруйданаллар.

2025 сыл кулун тутар 29 күнүн түүнүгэр Ленскэй куоракка үс эр киһи эмсэҕэлээччини «Тойота Ленд Крузер 200» массыынатыгар олорорун кэтээбиттэр. Бу кэмҥэ буруйданааччылартан биирдэстэрэ массыынаҕа чугаһаан, эмсэҕэлээччи хам туппут. Оттон иккис буруйданааччы массыынаҕа кэлэн, эр киһини төбөҕө охсубут, үһүстэрэ глушителлээх бэстилиэтинэн куттаан, уруулга олорбут. Ону кытта эмсэҕэлээччини атаҕын травматическай бэстилиэтинэн ыппыттар.

Салгыы буруйданааччылар массыынаны күрэтэн, эмсэҕэлээччини тыаҕа таһаарбыттар. Эр киһини тимир дубинканан кырбаабыттар. Буруйданааччылартан биирдэстэрэ, өлөрүнэн куттуур сыаллаах, сиргэ сытар эмсэҕэлээччи төбөтүн аттыгар бэстилиэтинэн иккитэ  ыппыт. Буруйу оҥорор дьайыыларын салгыыр сыаллаах, эр дьон эмсэҕэлээччини тутан олорон, кини массыынатынан Иркутскай куорат диэки айаннаабыттар. Онно Иркутскай уобалас Братскай – Усть-Кут суолугар буруйдаахтары полиция үлэһиттэрэ тохтоппуттар.