Киһини уорбут эр дьон сууттаннылар

Дьокуускай куорат борокуратуурата киин куорат икки олохтооҕун туһунан судаарыстыбаннай буруйдааһыны өйөөтө. Кинилэр РФ ХК 126-с ыстатыйатын 2-с чааһын «а», «в» уонна «г» пууннарынан, 30-с ыстатыйатын 3-с чааһынан сууттаннылар.

Суукка быһаарыллыбытынан, сууттанааччылар быйыл атырдьах ыйын 9 күнүгэр итирик сылдьан билэр киһилэрин кырбаабыттар уонна биллибэт сиргэ илдьээри, эчэйбит доҕордорун массыына багажнигар укпуттар. Ол эрээри, сууттанааччылар киһини уорарга соруммут хара санааларын тиһэҕэр тиэрдибэтэхтэр, тоҕо диэтэххэ, эчэйбит киһи багажнигы иһиттэн аһан, дьиэтигэр тиийэн саспыт.

Суут судаарыстыбаннай буруйдааччы санаатын, ону таһынан хас биирдиилэрин оруолларын уонна кыттыыларын таһымын учуоттаан, сууттанааччылартан биирдэстэрин 7 сылга, оттон иккиһин — 5 сыл 9 ыйга көҥүллэрин быһан,  кытаанах эрэсиимнээх көннөрөр холуонньаҕа хаайарга уураахтаата. Суут уурааҕа сокуоннай күүһүгэр киирэ илик, диэн СӨ Борокуратууратын пресс-сулууспата суруйар.