Киин куоракка «Туллук — эйэ, үтүө санаа бэлиэтэ» аһымал аахсыйа ыытылынна

Дойдуга Аҕа дойдуну көмүскээччи, Кэбээйи улууһугар Патриотизм сылынан уонна Кыайыы 80 сылын көрсө байыаннай дьайыы байыастарга аналлаах аһымал аахсыйа ыытылынна.

Ол курдук, суһал наадаҕа туттар малларын түмэргэ уонна ылыналларыгар көмө хомуйар сыаллаах оскуола иннинээҕи үөрэхтээһин тэрилтэлэрин күүһүнэн тэриллибит өрөспүүбүлүкэтээҕи аһымал аахсыйа Дьокуускай куорат «Арассыйа — мин устуоруйам» устуоруйа пааркатыгар буолан ааста. Аахсыйаны иилээн-саҕалаан ыыппыт тэрийээччилэринэн Дьокуускай куораттааҕы оҕо киинин тэрийээччи-педагога, «Волонтеры Туймаады» уопсастыбаннай түмсүү салайааччыта уонна Дьокуускай куорат 23 №-дээх “Цветик-семицветик” оҕону сайыннарар киин сүрүн иитээччитэ буоллулар.

Тэрээһиҥҥэ «Туллук — эйэ, үтүө санаа бэлиэтэ» өрөспүүбүлүкэтээҕи бырайыак кыттыылаахтара, ол эбэтэр Уус Алдан, Кэбээйи, Мэҥэ Хаҥалас улуустарын, Дьокуускай куорат уонна куорат чугаһынааҕы нэһилиэктэр уһуйааннара, ону кытта тэйиччиттэн Орто Халыма, Таатта, Бүлүү улуустарын уһуйааннара кытыннылар.

Тэрийээччилэртэн уонна уһуйааннартан ураты аахсыйаҕа 2-с №-дээх Дьокуускайдааҕы педагогическай кэллиэс, педагогическай үнүстүүт, ХИФУ устудьуоннара уонна сүрүн көмөлөһөөччүлэр, өйөөччүлэр — төрөппүттэр кыттыыны ыллылар. Барыта 60 тэрийээччи уонна 200-тэн тахса өйөөччү.

Бу суолталаах, дириҥ ис хоһоонноох тэрээһиҥҥэ Кэбээйи улууһуттан Кэбээйи нэһилиэгин «Мичээр» оҕону сайыннарар киин иитээччилэрэ Ирина  Кобякова уонна Наталья Винокурова, Татьяна  Максимова салайыытынан баран кыттыыны ылан кэллилэр.

Аахсыйаҕа Норуот фронын бэрэстэбиитэллэрэ, Дьокуускай куорат «Лига женщин» тэрилтэ салайааччыта Татьяна Егорова, оскуола иннинэ үөрэхтээһин салаатын преподавателэ Кыыдаана Данилова, аҕалара байыаннай дьайыыга сылдьар уонна биирдэстэрэ анал дьайыы бэтэрээнэ ини-бии Поповтар, байыаннай дьайыы бэтэрээнин кэргэнэ Аина Храмова ыҥырыылаах ыалдьыт буоллулар.

Хас биирдии кыттааччы уһуйааннар «Туллук — эйэ, үтүө санаа бэлиэтэ» бырайыак сүнньүнэн туох үлэни ыыппыттарын отчуоттаатылар, төһө ыйааһыннаах көмө баһыылкалары аҕалбыттарын көрдөрөн туран кэпсээтилэр уонна эҕэрдэ музыкальнай нүөмэрдэрин тириэртилэр. Тэрээһин устата маастар-кылаастар ыытылыннылар. Маастар-кылаастарга туллуктары, хаххалыыр сиэккэлэри тохтоло суох оҥордулар. Аахсыйа кэмигэр атыы-эргиэн дьаарбаҥката тэрилиннэ, сүүйтэриитэ суох лотерея оонньонно. Манна киирбит үп-харчы байыаннай дьайыыга дрон атыылаһан ыытарга ананна.

Тэрээһиҥҥэ Кэбээйи «Мичээр» оҕону сайыннарар киинэ, иитиллээччилэр, төрөппүттэр, үлэһиттэр көмөлөрүнэн оҥоһуллубут, түмүллүбүт 24 киилэттэн тахса ыйааһыннаах баһыылкаларын, олунньу 23 күнүнэн анаабыт бэлэхтэрин байыаннай дьайыыга кыттыылаахтарыгар ыытарга анаан туттардылар. Онон кэбээйилэр анал дьайыы байыастарыгар кырачаан оҕолортон саҕалаан биир санаанан түмсэн көмөлөрүн тириэртилэр.

Татьяна Максимова-Лазарева