Киин Баан бырыһыанын үрдэтиэҕэ
От ыйын 26 күнүгэр Арассыыйа Киин Баанын мунньаҕа буолуохтаах. Онно бырыһыаны өссө үрдэтэр туһунан быһаарыы ылыныахтаахтар. Киин Баан бырыһыанын үрдэппитин кэннэ, атын бааннар уурунууга, кирэдьииккэ бырыһыаннарын эмиэ үрдэтэллэр. Оттон икки улахан баан Киин Баан быһаарыытын күүппэккэ эрэ, бырыһыаннарын үрдэтэн эрэллэр.
ВТБ уонна МТС Баан от ыйын 23 күнүттэн бырыһыаннарын үрдэтэн эрэллэр диэн РБК суруйар.
ВТБ ортотунан, бырыһыаннаах уурунуу кылаакка 0,5 %, мунньуллар счекка 1% үрдэтэр. Онон бу бааҥҥа муҥутуур үрдүк бырыһыан уурунуу кылаакка 19% буолар. Саҥа килийиэннэргэ 19%, «Прайм» бакыаттаахтарга 19,1% буолуо диэн иһитиннэрэллэр.
МТС Баан 1,8%-нан үрдэтэн, уурунуу кылаакка бырыһыана 18% буолар.
Оттон Дом.РФ баан кэлэр нэдиэлэҕэ, Киин Баан мунньаҕын кэнниттэн үрдэтэргэ былааннанар.
Киин Баан ыстаапкатын бүтэһигин былырыын ахсынньыга 16% диэри үрдэппитэ. Киин Баан бэрэссэдээтэлэ Эльвира Набиуллина этэринэн, кинилэр инфляция намтыырын туһугар бырыһыаннарын үрдэтэллэр. Бэс ыйыгар инфляция үрдүк этэ — 8,6%, онон Киин Баан бырыһыана эмиэ биллэ үрдүүрэ күүтүллэр. Сыл бүтэһигэр 20% тиийиэн сөп диэн сорох эспиэрдэр этэллэр.
Бу көстүү биир куһаҕана диэн, кирэдьиит бырыһыана эмиэ үрдүүрэ буолар. Кыра дохуоттаах дьон кыайан кирэдьиит, ипэтиэкэ ылар кыахтара суох буолар. Дьиэ атыытын ырыынагар бу күүскэ дьайыан сөп.
Сообщить об опечатке
Текст, который будет отправлен нашим редакторам: