Киин быыбардыыр хамыыһыйа куоластааһын түмүгүн таһаарда

Бүгүн, балаҕан ыйын 11 күнүгэр, Саха Өрөспүүбүлүкэтин Киин быыбардыыр хамыыһыйата үс күннээх куоластааһын түмүгүнэн суруналыыстарга пресс-кэмпириэнсийэ ыытта.

Саха Өрөспүүбүлүкэтин Киин быыбардыыр хамыыһыйатын бэрэссэдээтэлэ Евгений Федоров быыбардыыр хамыыһыйалар тиһиктэрин туһунан быһаарыыттан саҕалаата.

Ол курдук, СӨ Киин быыбардыыр хамыыһыйата, Территориялардааҕы быыбардыыр хамыыһыйалар уонна учаастактааҕы быыбардыыр хамыыһыйалар уратыларын, тугу гыналларын, о.д.а кэпсээтэ. Саха сиригэр барыта 35 Территориялардааҕы быыбардыыр хамыыһыйаҕа, 810 учаастактааҕы быыбардыыр хамыыһыйаҕа барыта 6500-н тахса киһи үлэлээбитин бэлиэтээтэ.

Салгыы балаҕан ыйын 8 күнүттэн 10 күнүгэр диэри Ил Дарханы, Ил Түмэн сэттис ыҥырыытын норуот дьокутааттарын, Дьокуускай куорат Дууматын дьокутааттарын, тоҕус улуус баһылыгын уонна улуустааҕы, нэһилиэктэрдээҕи сэбиэттэр дьокутааттарын талыы туһунан ахтылынна.

Өрөспүүбүлүкэ ыраах сытар, мөлтөх суоллаах-иистээх 26 оройуонугар болдьох иннинээҕи куоластааһыҥҥа барыта 4621 киһи  кыттыбыт. Бу дьону куоластатаары быыбар хамыыһыйатын чилиэннэрэ салгын аалынан – 77, оттон сиринэн 209 эрэйдээх-буруйдаах суолунан айаннаабыттар.

«Мобильнай быыбардааччы» мэхэньиисиминэн Саха сиригэр 12097 киһи  куоластаан, саҥа сүүрээн сэҥээриллибитэ бэлиэтэннэ.

Евгений Федоров  байыаннай дьайыыга мобилизациянан ыҥырыллан уонна бэйэ баҕатынан кытта сылдьар биир дойдулаахтарбыт сокуонунан көрүллүбүт бырааптарын күөмчүлээбэт сыалтан, дойду састаабыгар саҥа киирбит эрэгийиэннэргэ 4 экстерриториальнай быыбардыыр хамыыһыйаны тэрийэн быыбардыыр кыаҕы биэрбиттэрин кэпсээтэ.
Ил Дархан дуоһунаһыгар түөрт хандьыдаат турбутуттан, куоластаабыт киһитин ахсаанынан олох ырааҕынан хаалларан, Саха сирин олохтоохторун итэҕэллэрин ылан, кыайыыны Айсен Николаев ситистэ. Куолаһы тиһэх ааҕыы  түмүгүнэн, Айсен Николаев 75,77%, Виктор Губарев – 10,41%, Гаврил Парахин – 5,69%, Игорь Борисов – 5,20% куолаһы ыллылар.
Оттон Ил Түмэҥҥэ баартыйалар испииһэктэринэн «Биир ньыгыл Арассыыйа» – 54,36%, КПРФ – 13,16%, «Сиэрдээх Арассыыйа – Кырдьык иһин!» – 9,39%, ЛДПР – 5,39%, «Саҥа дьон» – 14,17% ыллылар. Дьокуускай куораттааҕы Дуумаҕа баартыйалар «Биир ньыгыл Арассыыйа» – 47%, «Саҥа дьон» – 17%, КПРФ –17%, «Сиэрдээх Арассыыйа – Кырдьык иһин!» – 7%, ЛДПР – 7%, ыллылар.

Пресс-кэмпириэнсийэ чэрчитинэн, суруналыыстар быыбар хаамыытыгар тахсыбыт кэһиилэр, Үөһээ Бүлүүттэн норуот дьокутаатыгар хандьыдаат Владимир Поскачин кыайыытын, кини оннугар талыллар баһылык быыбарын, 2024 с. быыбар электроннай буолуоҕун дуу, суоҕун дуу, түмүк хаһан тахсыаҕын, о.д.а. тустарынан ыйыттылар. Онуоха Саха Өрөспүүбүлүкэтин Киин быыбардыыр хамыыһыйатын салалтата сөптөөх хоруйу биэрдэ.

Саха Өрөспүүбүлүкэтин Киин быыбардыыр хамыыһыйатын түмүктүүр боротокуола куоластааһын кэнниттэн уон күнү аһарбакка баттаныаҕа диэн Евгений Федоров түмүктээтэ.