Киин уот ситимнэригэр өрөмүөн хампаанньата саҕаланна

«Якутскэнерго» АУо киин уот ситимнэрин энергетиктара 2026 сыллааҕы өрөмүөннүүр хампаанньаны саҕалаатылар.

Энергетиктар араас күүрүүлээх кылаастаах 348 км уһуннаах электрическэй ситими өрөмүөннүүр уонна 450 км-тэн тахса ситими уларытар былааннаахтар. Олунньуттан 110 кВ күүрүүлээх магистральнай уоту биэрэр лииньийэлэр хапытаалынай өрөмүөннэрэ саҕаланар.

Өрөмүөн үлэтэ Дьокуускай куорат таһыгар, Горнай уонна Нам улуустарын хааччыйар 110 кВ «Дьокуускайдааҕы ГРЭС Саҥа — Радиоцентр салаалаах», «Дьокуускайдааҕы ГРЭС Саҥа — Бэрдьигэстээх салаалаах», «Дьокуускайдааҕы ГРЭС Саҥа — Хаҥалас салаалаах» салгын лииньийэлэригэр ыытыллыаҕа.

«Өрөмүөннүүр хампаанньа – биһиги тэрилтэбит үлэтин сүрүн чааһа буолар. Тэрээһиннэр Киин Саха сирин бүтүн уот ситимин комплексын эрэллээх үлэтин үрдэтиигэ туһуланаллар», — диэн кылаабынай инженер Михаил Варейкис бэлиэтээтэ.