Киин куоракка 52 саастаах бэлисипиэттээх эр киһини түҥнэри көттүлэр

Дьокуускайга сарсыарда от ыйын 30 күнүгэр биллибэт суоппар 52 саастаах бэлисипиэттээх эр киһини түҥнэри көппүт уонна быһылаан тахсыбыт сириттэн куоппут.

Бу туһунан киин куорат Госавтоинспекциятын пресс-сулууспата иһитиннэрэр. Суол быһылаана сарсыарда 09:40 чааска 121 №- дээх дьиэтин таһыгар Лермонтов уулуссатыгар тахсыбыт. Суоппар дьиэ территориятыттан тахсан иһэн бэлисипиэдинэн айаннаан иһэр эр киһини түҥнэри көппүт. Билиҥҥи туругунан бу чахчынан бэрэбиэркэ ыытыллар.

Саха сиринээҕи Госавтоинспекция пресс-сулууспата буруйдаах саахал миэстэтиттэн куотуутун иһин сыл устата эбэтэр балтараа сылга диэри болдьохтоох тырааныспары ыытар бырааба быһылларын эбэтэр 15 сууккаҕа диэри болдьохтоох хаайылларын туһунан санатта.