Киин куоракка 59 саастаах эр киһи атыы-эргиэн киинин витринатыттан статуэтканы уорбут

Дьокуускай куорат полициятын 3 №-дээх отделын дьуһуурунай чааһыгар биллибэт киһи 6 тыһыынча солкуобай суумалаах статуэтканы уорбутун туһунан атыы-эргиэн киинин бэрэстэбиитэлиттэн сайабылыанньа киирбит.

Бу туһунан Саха сиринээҕи ИДЬМ пресс-сулууспата  суруйар. Холуобунай ирдэбил үлэһиттэрэ суһал-көрдүүр дьаһалларынан урут сууттана сылдьыбыт 59 саастаах эр киһини туттулар.

Уорбаланааччы атыы-эргиэн киинигэр киирэн, витринаҕа матаһыыкыл дьүһүннээх 6 тыһ.солк. суумалаах  статуэтканы уорарга быһаарыммыт. Хара  санаалаах эр киһи этэринэн, уолугар Саҥа дьыллааҕы бэлэх оҥороору сыаналаах табаары уорбут. Уоруллубут табаар төннөрүлүннэ. Холуобунай дьыала тэрилиннэ, уорбаланааччы 2 сылга диэри болдьоххо көҥүлэ быһыллыан сөп.