Киин куоракка баһаар кэнниттэн икки биллибэт киһи өлүгэ көстүбүт

Бөлүүн, олунньу 23 күнүгэр, Дьокуускай куоракка 1-кы Пристанскай уулуссаҕа 2 этээстээх чааһынай дьиэ умайбыт. Бу туһунан ЫБММ прес-сулууспата суруйар.

Уоту умуруоруу кэмигэр дьиэҕэ икки биллибэт дьон өлүгэ булуллубут. Билигин лиичинэстэрин быһаарыыга үлэ ыытыллар. Уоту умуруорбуттар, чааһынай дьиэ 64 кв.м. иэнэ уокка былдьаммыт.

Тутуу баһаарынай сигнализацията уонна иһитиннэрэр тиһигэ суох эбит. ЫБММ дознавателэ барыллаан быһаарыытынан, баһаар уот боруобатыттан умайан тахсыбыт. Уоту умуруорууга ЫБММ 20 иписэлиис уонна 4 тиэхиникэ тардыллыбыт.