Киин куоракка бэлисипиэт уорбут 45 саастаах эр киһини туттулар

ИДьМ сулууспатын «Дьокуускайдааҕы» салаатын 2-с нүөмэрдээх отделын дьуһуурунай чааһыгар олохтоох киһи сайабылыанньа суруйбут. Бу туһунан СӨ ИДьМ пресс-сулууспата иһитиннэрэр.

Эр киһи иһитиннэрбитинэн, биллибэт киһи кини 21 000 солк. тахса сыаналаах бэлисипиэтин дьиэ таһынааҕы тиэргэнтэн уоран ылбыт. Ыытыллыбыт суһал-көрдүүр дьайыылар түмүктэригэр холуобунай ирдэбил үлэһиттэрэ урут сууттана сылдьыбыт 45 саастаах эр киһини туттулар.

Силиэстийэҕэ быһаарыллыбытынан, уорбаланааччы Октябрьскай уулуссаҕа олорор дьиэ аттынан ааһан иһэн, бэлисипиэт турарын бэлиэтии көрбүт. Уорууттан харыстыыр троһун быһа тардан, бэлисипиэти уоран баран күрээбит. Уоруллубут бэлисипиэт былдьанна. РФ  Холуобунай кодексатын 158-с ыстатыйатын 2-с чааһынан («Уоруу») холуобунай дьыала тэрилиннэ. Бу ыстатыйанан  буруйдаах 5 сылга диэри көҥүлэ быһыллыан сөп.