Киин куоракка өрөбүл күннэргэ 22 суол быһылаана тахсыбыт

Дьокуускай куорат Госавтоинспекция иһитиннэрбитинэн, өрөбүл күннэргэ 22 суол быһылаана тахсыбыт, биэс киһи эчэйиини ылбыт,  биир киһи суорума суолламмыт. 

Бэс ыйын 28  күнүгэр сарсыарда 9  чааска  42 саастаах  «Mitsubishi Pajero» массыына суоппара  Кузьмин — Можайскай уулуссалар быһа охсуһууларыгар  сүрүн суолунан айаннаан иһэр 25 саастаах   «Suzuki Swift» массыына суоппарыгар суолу биэрбэтэх. Ол түмүгэр суол быһылаана тахсан,  «Suzuki Swift» суоппара уонна  пассажира  эчэйиини ылбыттар.

Эмиэ бу күн  күнүс 13  чаас саҕана «Нам» суолга  29 саастаах  «Toyota Premio» суоппара  иннигэр айаннаан иһэр  «Nissan X-Trail» массыынаҕа баран түспүт. Охсуллуу күүһэ бэрт буолан,  «Nissan X-Trail» иннигэр баран иһэр   «Toyota Harrier» түспүт.  Бу быһылааҥҥа  «Toyota Premio» пассажирдара эчэйиини ылбыттар.

Аны киэһэ 19 чаас саҕана  Сэбиэскэй Аармыйа 50 сыла уулусса  89А  дьиэтин  таһыгар  48 саастаах  «Toyota Tercel»  суоппара  метеорологическай усулуоубуйаны учуоттаабакка, уруулун кыайан туппакка, уулуссатааҕы уот тирэҕэр баран түспүт.  Госавтоинспекция үлэһиттэрэ миэстэтигэр тиийэн  быһаарсыбыттара, суоппар арыгы испит эбит.