Киин куоракка өрөһүлүү быраҕыллыбыт сибиинньэ атахтарын уонна сылгы төбөлөрүн булбуттар

Дьокуускайга Бүлүүлүүр трасса 22-с километрыгар сибиинньэ атахтарын, сылгы төбөлөрүн куулга уган тиэйэн бырахпыттарын буллулар. СИА-ҕа хаартыскалары бэнидиэнньиккэ, ыам ыйын 19 күнүгэр, эрэдээксийэ ааҕааччыта ыыппыт. Киирбит иһитиннэриинэн, Дьокуускай бэтэринээрийэтин управлениета бэрэбиэркэни ыытыаҕа, миэстэтигэр исписэлиистэр тахсыахтара.

«Барыта 25 киилэлээх 40 куул булулунна. Уопсай ыйааһына биир туоннаттан тахса. Наадалаах боруобалар ылылыннылар. Силиэстийэ саҕаланна. Сокуоннайа суох биологическай сыбаалканы тоҕуунан Россельхознадзор управлениетын биллэрдилэр», — диэн куорат бэтэринээрийэтин управлениетыгар иһитиннэрдилэр.

Россельхознадзорга иһитиннэрбитинэн, бүгүн, ыам ыйын 22 күнүгэр, полиция үлэһиттэрин кытары исписэлиистэр тахсыахтара уонна буруйдаахтары быһаарыахтара. Бэлиэлэрэ бааллар.

«Маннык дьайыылар сокуонунан бобуулаахтар, тобохтор уматыллыахтаахтар. Буруйдаах көстүбэтэҕинэ, сыбаалкаҕа ордук кутталлаах статуһу иҥэриэхтэрэ. Кутталы үөскэтиэн сөп», — диэн Россельхознадзорга бэлиэтээтилэр. Ону сэргэ биэдэмистибэҕэ бэлиэтээбиттэринэн, тобохтор хаһаайына быһаарыллыбатаҕына, тобоҕу уматыы учаастак хаһаайыныгар сүктэриллэр.