Киин куоракка хаары ыраастаан бүтэрэн эрэллэр

Быйыл сир аайы хаһааҥҥытааҕар да халыҥ хаар түстэ.

Онон бу күннэргэ хаары ыраастааһын тэтимнээхтик бара турар. Ааспыт өрөбүллэргэ кэтэх дьиэлээхтэр хаар ыраастааһыныгар түбүгүрдүлэр. Киин куорат элбэх кыбартыыралаах олорор дьиэлэрин аттыгар хаар ыраастыыр массыыналар, араас тиэхиньикэ эмиэ үлэлээтэ.

Урукку сылларга маннык үлэ ыытылларын өйдөөбөппүт.  Быйыл хаара элбэҕиттэн маннык тэрээһиннээх үлэ бардаҕа.

Киин куорат уулуссаларын эмиэ ыраастаан бүтэрэн эрэллэр. Ууллан испит хаар, аны тоҥорон, килэҥ мууска кубулуйда. Онон уулуссаларга ууллубут хаар-муус уутун аһардар үлэ бара турар.

Хаартыскаҕа Дмитрий Семенов түһэриитэ/СИА. 

Бүгүн киин куорат былаанныыр мунньаҕар тустаах тэрилтэ салалтата тоҕус ууну хачайдыыр ыстаансыйа бэлэмин, өссө иккини бу нэдиэлэҕэ үлэлэтэллэрин туһунан иһитиннэрдилэр.

Маны таһынан киин куорат даамбаларын бэрэбиэркэлиэхтэрэ.