Киин куоракка инбэлииттэн харчыны уорбут эр киһини туттулар

Саха сиринээҕи ИДьМ  сулууспатын 1 №-дээх дьуһуурунай чааһыгар олохтоох инбэлиит сайабылыанньа суруйбут. Эр киһиттэн 50 000 солк. харчытын уорбуттар.

Суһал-көрдүүр дьаһалларынан холуобунай ирдэбил үлэһиттэрэ урут сууттана сылдьыбыт 50 саастаах эр киһини туттулар. Бу туһунан ИДьМ пресс-сулууспата иһитиннэрэр.

Силиэстийэ быһаарыытынан, эр дьон балыыһаҕа эмтэнэ сытан билсибиттэр.  Эмсэҕэлээччи инбэлиит хаамар кыаҕа суох буолан, биир палаатаҕа сытар эр киһини маҕаһыынтан бородуукта атыылаһарга көрдөспүт. Эр дьон балыыһаттан тахсан баран салгыы эмиэ билсэ-кэпсэтэ сылдьыбыттар.

Быһылаан тахсыбыт күнүгэр хара санаалаах эр киһи доҕоругар ыалдьытты кэлбит. Итини таһынан харчытын ханна кистии сытарын билэн, көрбөтүнэн туһанан 50 тыһыынча солкуобайы ууруммут харчытын уорбут. Уоруллубут харчыны  тус наадатыгар туһаммыт.

Холуобунай дьыала тэрилиннэ. Буруйданааччы 5 сылга диэри болдьоххо көҥүлэ быһыллыан сөп.