Киин куоракка наркопритону тэрийбит эр киһи дьыалата суут көрүүтүгэр ыытылынна

ИДьМ управлениетын 1 №-дээх полиция отделын дознавателинэн наркотигы туһаныыга уонна киһи доруобуйатын эчэтиигэ холуобунай дьыала тэрилиннэ. Бу буруйдары оҥорууга урут халааһыҥҥа сууттана сылдьыбыт 37 саастаах олохтоох эр киһи тутуллубут.

2023 сыл сэтинньитигэр дьахтар уонна уопсай кыра уоллара олорор чааһынай дьиэтигэр эр киһи наркопритон тэрийбит. Сыл аҥаарын тухары эр киһи бэйэтин дьиэтигэр араас дьону мунньубут уонна бобулаах наркотигы сиэбит.

Былырыын ыам ыйыгар ИДьМ уонна Росгвардия үлэһиттэрэ буруйданааччы дьиэтигэр тиийэннэр, барыта алта киһини тутан хаайбыттар. Эр дьон бары наркотик сиэбит туруктаахтара биллибит. Кинилэри таһынан дьиэҕэ кыра уол оҕо эмиэ баара быһаарыллыбыт. Уол ийэтэ ити кэмҥэ дьиэтигэр суох эбит.

Полицейскайдар наркопритонтан араас эттиктэри, наркотиктары, иһиттэри, гашиш арыылаах фольганы, ону тэҥэ химическэй суурадаһынын булбуттар.

Кутталлаах балаһыанньаҕа түбэспит оҕону сокуоннай саастарын ситэ илик оҕолор дьыалаларыгар иниспиэктэрдэргэ туттарбыттар, онтон салгыы дьиэ кэргэн иитиитигэр көмөлөһөр өрөспүүбүлүкэтээҕи кииҥҥэ киллэриллибит.

Силиэстийэ түмүгүнэн наркотиктаммыт эр дьон бары эппиэккэ тардыллыбыттар, оттон уол оҕо ийэтин сыһыаныгар административнай боротокуол толорбуттар.

Маны таһынан, наркопритон тэрийээччитэ дьахтары сирэйгэ охсон сыҥааҕын тоһуппута биллибит. Ол эрээри дьахтар полицияҕа тыллаабатах. Бу дьыаланан буруйдаах эмиэ эппиэтинэскэ тардыллыаҕа. Холуобунай дьыалалар суут көрүүтүгэр ыытылыннылар. Бу туһунан ИДьМ пресс-сулууспата суруйар.