Киин куоракка оҕо уһуйаантан тахсан барбытынан полиция бэрэбиэркэ ыытар

Атырдьах ыйын 6 күнүгэр ИДьМ Дьокуускайдааҕы 3-с нүөмэрдээх полиция салаатын дьуһуурунай чааһыгар дьахтар төлөпүөннээн, Михаил Николаев аатынан проспекка кыра кыыс оҕо соҕотоҕун сылдьар диэн иһитиннэрбит.

Бэрэбиэркэ быһаарбытынан, уһуйаан тэлгэһэтигэр иитээччини кытта таһырдьа салгын сии сылдьан, 5 саастаах оҕо тэлгэһэ ааныгар чугаһаабыт, магнитнай хатыыры баттаан уулуссаҕа тахсан хаалбыт.

Олохтоох дьахтар полицияҕа иһитиннэриэр диэри оҕо чаас аҥаара курдук уулуссаҕа соҕотоҕун сылдьыбыт. Уһуйаан үлэһиттэрэ оҕо сүппүтүн таһырдьа салгын сиэн киирэн баран тута быһаарбыттар, быраабы араҥаччылыыр уорганнарга уонна төрөппүттэригэр биллэрбэккэ бэйэлэрэ көрдөөбүттэр.

Билиҥҥитэ тустаах түгэнинэн бэрэбиэркэ ыытыллар, ол түмүгүнэн быһаарыы ылыныллыаҕа. Бу туһунан ИДьМ пресс-сулуупата иһитиннэрэр.