Киин куоракка оҕунан ытыыга чөмпүйэнээт түмүктэннэ

Дьокуускайга атырдьах ыйын 17 күнүгэр оҕунан ытыыга өрөспүүбүлүкэ чемпионата чөмпүйэнээтэ түмүктэннэ. Күрэхтэһии түмүгүнэн Арассыыйа Куубагар кыттар хамаанда чилиэннэрэ быһаарылыннылар.

Саха сирин Оҕунан ытыыга Федерациятын толорооччу дириэктэрэ Василий Румянцев турнир суолтатын бэлиэтээтэ. «Бу күрэхтэһии Саха Өрөспүүбүлүкэтин иккис чөмпүйэнээтэ буолар. Биһиги успуорт көрүҥэр сүрүн күрэхтэһиилэр бары сүүмэрдэммит хамаандалар испииһэктэрин уонна бастыҥнары  быһаараллар. Бу күрэхтэһиилэр Бүтүн Арассыыйатааҕы таһымҥа сүүмэрдиир түһүмэх буолаллар. Бу сырыыга, чуолаан, балаҕан ыйыгар Чебоксары куоракка ыытыллар Арассыыйа Куубагар сүүмэрдээһин буолла», — диэн кини эттэ.

Румянцев эбэн эппитинэн, сүүмэрдэһини 12 күрэсчит — алта эр киһи уонна алта дьахтар ааста. Кыттааччылар эр дьоҥҥо уонна дьахталларга классическай уонна блочнай оҕунан ытыы көрүҥнэригэр наҕараада иһин кииристилэр. Сүрүн турниры кытта тэҥҥэ бэтэрээннэргэ өрөспүүбүлүкэ чөмпүйэнээтэ ыытылынна, кинилэр эмиэ икки көрүҥҥэ күрэхтэстилэр.

Күрэхтэһиигэ барыта 68 спортсмен уонна 19 бэтэрээн кытынна. Чөмпүйэнээт бырагырааматыгар түөрт дистанцияҕа (эр дьоҥҥо: 90, 70, 50, 30 м; дьахталларга: 70, 60, 50, 30 м) М-1 эрчиллиигэ квалификационнай ытыылар, ону таһынан хамаанданан киирсиилэр буоллулар.