Киин куоракка «Олохтоох каадыры — бырамыысыланнаска» үлэнэн хааччыйыы дьаарбаҥка буолан ааста

Атырдьах ыйын 22 күнүгэр куорат уокуруктарынан Нэһилиэнньэ дьарыктаах буолуутун управлениетыгар – «Мин үлэм» офиска «Олохтоох каадыры — бырамыысыланнаска» бырайыак чэрчитинэн гражданнары үлэнэн хааччыйыы дьаарбаҥка буолан ааста.

Тэрээһиҥҥэ 16 бырамыысыланнас тэрилтэлэрэ кытыннылар. Бырамыысыланнай тэрилтэлэргэ 269 вакансияҕа 1179 үлэ миэстэтэ биллэрилиннэ. Үлэ миэстэтин вакансияларын «АЛРОСА» АХ, «Колмар» ХЭУо УХ,  «Сахатранснефтегаз» АУо, «Южно-Верхоянская горнодобывающая компания» АУо,  «Якутская топливно-энергетическая компания» БАУо,  «Якутуголь» АУо,  «Эльгауголь» ХЭУо,  «Западная» АУо, «Саханефтегазсбыт» АУо, «Золото Селигдара» АУо,  «Железные дороги Якутии» АУо,  «Теплоэнергосервис» АУо,  «Ленское объединенное речное пароходство» ПАУо,  «Алмазы Анабара» АУо,  «Арктик Капитал» ХЭУо, «Прогноз Серебро» ХЭУо хампаанньалар таһаардылар.

Дьаарбаҥкаҕа Дьокуускай куорат, Амма, Мэҥэ Хаҥалас, Чурапчы, Хаҥалас, Нерюнгри, Өлүөхүмэ, Ньурба, Горнай улуустарыттан 80-тан тахса үлэ көрдөөччү кытынна. Ол иһигэр тэрээһини 16  байыаннай дьайыы кыттыылаахтара уонна кинилэр дьиэ кэргэттэрин чилиэттэрэ сырыттылар.

Үлэлиир баҕалаах гражданнар үлэ биэрээччилэргэ туһааннаах кэпсэтиини аастылар, кинилэр интэриэһиргиир ыйытыктарыгар хоруйдаатылар, ону тэҥэ профессиональнай ориентацияҕа, үөрэхтээһиҥҥэ уонна резюме оҥорууга судаарыстыбаннай өҥөлөрү ыллылар. Кэпсэтии түмүгүнэн үлэ биэрээччилэри үлэҕэ киллэриигэ 40-ча хандьыдаат талылынна. Ыытыллыбыт дьаарбаҥка түмүгүнэн Саха сирин нэһилиэнньэ дьарыктаах буолуутун сулууспата үлэҕэ ылыллыбыт хандьыдааттары ый устата кэтээн көрүөҕэ.