Киин куоракка саамай сыаналаах кыбартыыра төһө буоларый?

Киин куоракка 200 квадратнай миэтэрэ иэннээх, киэҥ-куоҥ гардеробтаах, джакузилаах, ыраас, сырдык аныгылыы оҥоһуулаах куухуньалаах, панорамнай түннүктэрдээх, саҥалыы өрөмүөннээх кыбартыыра сыаната төһө буоларый? Маннык дыбарыаска олоруоххутун баҕараҕыт дуо?

Дьэ, ол эрэн, сыана «абытай», кыбартыыра атыылаһарга кырата 30 мөлүйүөн солкуобай үп-харчы наада. Yakutia-daily кыбартыыра сыаналарынан бэйэтэ рейтинг оҥордо уонна Дьокуускайга куоракка атыыга таһаарбыт муҥутуур сыаналаах кыбартыыралар бастыҥ үрдүк сыаналаахтарын (ТОП—5) тэҥнээн көрдүлэр. Сыана лаппа үрдээбит. Ол курдук, 2023 сыл муус устар ыйыгар Саха сирин киин куоракка саамай сыаналаах кыбартыыра 29,85 мөл. солк. эбит буоллаҕына, бу сыл атырдьах ыйыгар кыбартыыра сыаната 32 мөлүйүөнтэн саҕаланар. Оттон рекорд олохтообут «дыбарыас» сыаната —  45 мөлүйүөн солкуобай!

Оччо харчыны ороскуоттуур буоллахпына, саҥа кыбартыыра иһигэр туох киирэрий? Бүгүн Дьокуускай куоракка «көмүс» сыаналаах кыбартыыралары өҥөйөн көрүөххэ.

Бастакынан, испииһэги 32 мөлүйүөн солкуобайдаах «Титаник» дьиэҕэ 4 хостоох кыбартыыра  арыйар.  Бу дьиэ Национальнай художественнай түмэлин кэннигэр турар. Дьиэ 2005 сыллаахха тутуллубут.  4-с этээс. Кыбартыыра иэнэ —  142 квадратнай миэтэрэ. Бу  түннүгэ күөх хонууга, ЗАГС, эргэ куорат хайысхатыгар арыллар. Икки санузеллаах, үс утуйар хостоох, улахан гостинайдаах. Миэбэл, тиэхиньикэ барыта саҥа хаһаайыҥҥа хаалар. Тиэргэн харабыллаах, шлагбаум уонна видеокамера баар.

Иккиһинэн, 34,5 мөл. солкуобайдаах  202 түөлбэҕэ 4 хостоох кыбартыыра. Бу дьиэни  «Сэттэ» хампаанньа туппут, уон этээстээх. Дьиэ 2007 сыллаахха тутуллубут. 10-с этээс. Кыбартыыра иэнэ 212 квадратнай миэтэрэ. Түннүгэ күөх хонуу уонна Өлүөнэ өрүс хайысхатыгар  арыллаллар. Автономнай ититиилээх. Икки санузеллаах уонна сауналаах. Миэбэл уонна тиэхиньикэ хаалаллар. Этээскэ икки эрэ кыбартыыра баар. 18,2 кв. миэтэрэ иэннээх туспа ыскылааттаах. Таарыйа эттэххэ, ыйыллыбыт 212 кв.м. иэнигэр киирбэт. Дьиэ олбуордаах, сылаас парковкалаах. Бас билиигэ гаражтаах, ол эрээри туспа атыыланар.

Үсүһүнэн, Таалай күөл аттыгар 35 мөлүйүөн солкуобай суумалаах 3 хостоох кыбартыыра. Бу  дьиэ тоҕус этээстээх дьиэлэр тула турар. Тутуу 2010 сыллааҕы. 4-с этээс. Иэнэ — 225 квадратнай миэтэрэ. Уратыта диэн түөрт этээстээх дьиэҕэ лифтээх. Барыта аҕыс кыбартыыралаах. Түннүгэ — 12 устуука. Оттон балкона — түөрт! Үс санузеллаах уонна этиллибитин курдук, алта хостоох. Автономнай ититиилээх. Бастакы этээскэ гаражка тахсыахха сөп. Сабыылаах территориялах, видеонан кэтээн көрөллөр. Маннык дьиэлэри билигин туппаттар диэн дьиэ хаһаайына бэлиэтиир.

Төрдүһүнэн,  36 мөлүйүөн солкуобайдаах «Проспект» дьиэҕэ 4 хостоох кыбартыыра. Мэрия аттыгар Курашов аатынан уулуссаҕа турар. Тутуу 2014 сыллааҕы. 15-с этээс. Кыбыратыыра иэнэ — 180 квадратнай миэтэрэ. Бу дьиэттэн сарайыгар тахсыахха сөп. Түннүктэрэ ЦУМ диэки тахсаллар. Аныгы өрөмүөннээх. Икки санузеллаах, биирэ —  ванналаах, иккиһэ-душтаах. Таҥас сууйар туспа хостоох. Кыбартыыра төгүрүктүҥү быһыылаах. Сабыылаах оҕо былаһааккалаах, шлагбаумнаах улахан парковкалаах.

Бэсиһинэн, Саха циркэтин аттыгар 45 мөлүйүөн солкуобай суумалаах 5 хостоох кыбартыыра. Тутуу 2011 сыллааҕы дьиэ. 10-с этээс. Кыбартыыра иэнэ — 210 квадратнай миэтэрэ. Түннүктэрэ LX-киин уонна телебашня диэки тахсаллар. Кыбартыыраҕа евроремонт оҥоһуллубут, барыта кыһыл көмүс өҥнөөх. Сибэтиилинньигэ олус элбэх. Үс санузеллаах, олортон бииригэр джакузи турар, ону тэҥэ таҥас сууйар туспа хостоох. Киэҥ-куоҥ кыбартыыраҕа икки кондиционердаах. Миэбэл хаалар.