Киин куоракка саҥа искибиэр уонна оҕо былаһааккалара баар буолуохтара

Сэбиэскэй Сойуус Дьоруойа Федор Попов аатын үрдүктүк тутан, Дьокуускай куоракка Федор Попов аатынан саҥа искибиэр тутуллар. Ону кытта Кальвица уулуссаҕа 7/1 уонна 9/1 дьиэлэр тиэргэннэригэр оҕо былаһааккалара баар буолуохтара. Бу туһунан сурууналыыстарга пресс-тур кэмигэр иһитиннэрдилэр.

Саҥа искибиэр «Олорор дьиэ уонна куорат эйгэтэ» федеральнай бырайыак иитинэн киин куорат Дзержинскай уонна Федор Попов аатынан уулуссалар быһа охсуһууларыгар   тутуллар. Бу бырайыак уопсастыбаннай миэстэни талыы Бүтүн Арассыыйатааҕы куоластааһыныгар кыайбыта.

Санатан эттээхэ, куоластааһыҥҥа барыта 124 623 киһи кытыбыта, былырыын 74 690 киһи этэ. Өрөспүүбүлүкэ 17 улуустан 67 эбийиэги киллэрбититтэн, кыайыылааҕынан 32 эбийиэк таҕыспыта. Маныаха Үөһээ Бүлүү улууһуттан 10 бырайыактан биэһэ, Мииринэй улууһуттан аҕыстан түөрдэ, Нерюнгри улууһуттан алтаттан үһэ бастаабыттара. Куоластааһын дойду баһылыга Владимир Путин көҕүлээбит «Олорор дьиэ уонна куорат эйгэтэ» национальнай бырайыак «Куорат тупсаҕай эйгэтин тэрийии» федеральнай бырайыагын иитинэн ыытыллыбыта. Бу иннинэ Ил Дархан Айсен Николаев: «Кэлэр сылга Кыайыы 80 сылын бэлиэтиэхпит. Саха норуотуттан Сэбиэскэй Сойуус бастакы Дьоруойа Федор Кузьмич Попов аатын үйэтитэн пааматынньык туруоруохпут уонна искибиэри тупсарыахпыт», — диэбитэ.

«Быйыл  Федор Поповка Сэбиэскэй Сойуус  Дьоруойа ааты иҥэрии 80 сылын туолбута. Ол курдук, 2025 сылга Улуу Кыайыы 80 сылын көрсө Федор Поповка пааматынньык туруоруллуоҕа. Искибиэр «Олорор дьиэ уонна куорат эйгэтэ» национальнай бырайыак «Куорат тупсаҕай эйгэтин тэрийии» федеральнай бырайыагынан тутуллар, — диэн СӨ Архитектураҕа уонна куорат тутуутун управлениетын Ил Дархан иһинэн архитектура-тутуу салаатын салайааччытын э.т. Федора Алексеева кэпсээтэ. Ити курдук 2025 сылга Улуу Кыайыы 80 сылын көрсө Сэбиэскэй Сойуус Дьоруойа Федор Попов пааматынньыга туруоҕа. Эбийиэк бу сыл балаҕан ыйыгар тутуллан үлэҕэ киириэҕэ. Бырайыагынан искибиэр иһинэн тротуарнай билиитэлээх дьон сылдьар анал суоллара, ыскамыайкалар уонна сырдатыылаах буолара күүтүллэр. Бэдэрээтчит «Вертикаль» ХЭУо.

Оттон Кальвица уулуссаҕа 7/1 уонна 9/1 дьиэлэр тиэргэннэригэр оҕо былаһааккалара РФ субъектарын экэнэмичэскэй үүнүүтүн кииннэрин социальнай сайдыытын былаанын тэрээһиннэринэн, «Уһук Илиҥҥи тиэргэннэри тупсарыы» бырайыагынан оҥоһулдар. Бэдэрээтчит  «Основа» ХЭУо. «Билигин оҕо былаһааккатын бетона кутулунна, аныгыс нэдиэлэҕэ манна аспаал ууруллуоҕа. Ол кэннэ тимир олбуордарын уонна оҕо оонньуур комплексын туруоруохпут. Үлэни бэс ыйын саҥатыгар саҕалаабыппыт уонна балаҕан ыйын бүтүүтэ түмүктүөхпүт», — диэн «Основа» ХЭУо салайааччыта Станислав Лукинов билиһиннэрдэ.