Киин куоракка түүҥҥү кулуупка  эр киһи сыҥааҕын тоһуппуттар

Дьокуускай куорат 3 №-дээх полициятын отделын дьуһуурунай чааһыгар олохтоох  киһи биллибэт киһи  эчэйии оҥорбутун туһунан тыллаабыт. Бэрэбиэркэ кэмигэр полиция үлэһиттэрэ уорбаланааччы лиичинэһин быһаардылар.

Уорбаланааччы Кэбээйи улууһуттан төрүттээх 19 саастаах уол буолара биллибит. Бу туһунан ИДьМ сулууспатын пресс-сулууспата иһитиннэрэр.

Силиэстийэҕэ быһаарыллыбытынан, түүҥҥү кулуупка сынньана сылдьан эр дьон икки ардыларыгар кыыстан сылтаан иирсээн тахсыбыт. Уорбаланааччы билэр кыыһын көмүскэһэн, утарылаһааччытыгар эчэйии оҥорбут, ол түмүгэр эмсэҕэлээччи сыҥааҕа тостубут. Эр киһи мэдиссинискэй көмөҕө наадыйбыт.

«Доруобуйаҕа орто ыар содулу соруйан оҥоруу» диэн ыстатыйанан холуобунай дьыала көбүтүлүннэ. Бу ыстатыйанан үс сылга диэри көҥүлү быһар көрүллэр.