Киин куоракка XIII «НАУКА 0+» бэстибээл аһылынна

Бастатан туран, оҕолор уонна ыччат билимҥэ, чинчийэр үлэҕэ интэриэстэрин тардар сыалтан Саха сиригэр сыл аайы Бүтүн Арассыыйатааҕы «НАУКА 0+» бэстибээл тэриллэр.

Бэстибээл Арассыыйа таһымыгар быйыл сүүрбэһис төгүлүн ыытыллар буоллаҕына, Саха сиригэр уон үһүс бэстибээлинэн буолар. Билим бэстибээлэ саамай киэҥ араҥаҕа – оҕо уһуйаанын иитиллээччилэриттэн саҕалаан биэнсийэлээхтэргэ тиийэ ананар. Ол иһин «НАУКА 0+» диэн ааттанар.

Бэстибээл кыттыылаахтара учуонайдар тугунан дьарыктаналларын, чинчийии сайдыытыгар туһаайыллар нолуок төлөөччүлэр харчылара туохха барарын, билим олох хаачыстыбатын хайдах тупсарарын уонна аныгы киһиэхэ туох кэскили арыйарын билиэхтэрэ. Ону таһынан, Билим бэстибээлэ учуонайдар ситиһиилэрин кытта билиһиннэрэр, чинчийии инники кирбиитигэр туох буола турарын бэйэлэриттэн истэр-билэр кыаҕы биэрэр.

Быйыл Саха сиригэр XIII «НАУКА 0+» бэстибээл алтынньы 23 күнүттэн 25 күнүгэр диэри ыытыллыаҕа — биллиилээх учуонайдары, педагогтары, эспиэрдэри, устудьуоннары уонна оскуола үөрэнээччилэрин түмүөҕэ. Ол гынан баран, урукку сыллартан уратыта диэн, быйылгы бэстибээл тарҕаммыт көрүҥүнэн ыытыллар, ол эбэтэр тэрээһиннэр 20 араас былаһааккаҕа тэриллиэхтэрэ.

Уопсайа, Билим бэстибээлин чэрчитинэн 180-тан тахса тэрээһин ыытыллыаҕа. Быйылгы тэрээһин сүрүн тиэмэтэ – «Эн квантовай Аан дойдуҥ».

Үөрүүлээх аһыллыыта бүгүн, алтынньы 23 күнүгэр, «РНА Сибиирдээҕи салаатын Дьокуускайдааҕы научнай киинэ» федеральнай чинчийэр кииҥҥэ буолан ааста. Бу бэлиэ түгэнинэн кыттааччылары ФИЦ «ДьНК СС РНА» генеральнай дириэктэрэ, РНА академига Михаил Лебедев эҕэрдэлээтэ. Кини ыччакка туһаайан, бүгүн Арассыыйа иннигэр турар ыҥырыылары быһаарар наадатын эттэ.