Бу күннэргэ Дьокуускай куорат Дууматын мунньахтыыр саалатыгар «Юные якутяне» оҕо уопсастыбаннай тэрилтэтин кытта дьокутааттар көрсүһүүлэрэ буолан ааста.
Тэрээһиҥҥэ Москваҕа Бүтүн сойуустааҕы Ыччат үөрэхтээһиҥҥэ уонна научнай үлэнэн дьарыктанар тэрилтэлэрин XVII «Мин сокуону оҥорууга көҕүлээһиним» куонкуруһугар Дьокуускай куорат оскуолаларыттан ситиһиилээхтик кыттан кэлбит үөрэнээччилэр дэлэгээссийэлэрин чиэстээтилэр.
Бу куонкуруһу Судаарыстыбаннай Дуума Федеральнай Мунньаҕа уонна «Интеграция» көхтөөх ыччат уопсастыбаннай тэрилтэтэ тэрийэн ыыталлар. Икки түһүмэҕинэн (эрэгийиэннээҕи уонна кэтэхтэн Арассыыйатааҕы таһымнаах) ыытыллар куонкурус бэрт сытыы киирсиилээх. Ол курдук, «Мин сокуону оҥорууга көҕүлээһиним» куонкуруска 50 куораттан 435 кыттааччы сайаапка биэрбит. Кыттааччылары бэлэмниир педагогическай наука кандидата Валентина Николаева иһитиннэрбитинэн, куонкуруска 193 кыттааччы дакылаат аахпытыттан Саха сирин оҕолоро, устудьуоннара, аспираннара бары эспиэрдэр болҕомтолорун тардыбыттар.
Кинилэр чинчийбит бырайыактара «Мин сокуону оҥорууга көҕүлээһиним» научнай үлэлэр кинигэлэригэр киирбит. Оттон Валентина Дамдиновна «Куонкурус кыайыылааҕын бэлэмнээһиҥҥэ бастыҥ педагог» дипломунан наҕараадаламмыт уонна » Настаабынньык-лиидэр» диэн бэлиэни туппут.
Кэрэхсэбиллээҕэ баар, Саха сирин дэлэгээссийэтэ «Мин сокуону оҥорууга көҕүлээһиним» куонкуруска кыһыҥҥы айан суолугар, халаан кэмигэр ыарыһахтарга телемэдиссиинэ көмөтүгэр, халаан ороскуотун ааҕыыга экэнэмиичэскэй быраабы тутуһуу өрүттэрин, Арктикаҕа үрүҥ эһэни көрсө түһүүгэ бэйэни харыстаныыны быраап өттүттэн көрүү, уһук арктическай оройуоннарга үөрэхтээһиҥҥэ оҕо быраабын тутуһуу, Саха сирин уһулуччулаах диэйэтэллэрин үйэтитии, норуот эпическэй айымньытын — олоҥхону харыстааһын уонна көмүскээһин курдук араас хайысхалаах боппуруостарга чинчийиилэри ыыппыттар.
Онон бу суолталаах тэрээһиҥҥэ Москваҕа ситиһиилээхтик кыттыбыт оҕолору Дьокуускай куорат Дууматын дьокутааттара анаан чиэстээтилэр.
Бу видеоҕа үөр табалар улахан айан суолун туораан, субуһан эрэллэрэ көстөр. Эчи элбэхтэрин, көрөргө бэртээхэй…
Улуу Кыайыы күнүн көрсө, ыам ыйын 8 күнүгэр, Ил Дархан Айсен Николаев «Бэс Чагда» санаторий…
Саха сиригэр Баатаҕай кратера ууллан, кэнники өссө эбии улааппытын бэлиэтээтилэр. Ол курдук, өрөспүүбүлүкэҕэ ирбэт тоҥ…
Андрей Петрович Никифоров аатын сүгэр уулусса интерактивнай бэлиэтин билиһиннэриитэ буолла. Олох диэн улуу күүс, кини…
Бүгүн Абый улууһун олохтоохторо VIII "Азия оҕолоро" норуоттар икки ардыларынааҕы успуорт оонньууларын уотун уруйдуу көрүстүлэр.…
«Азия оҕолоро» норуоттар икки ардыларынааҕы успуорт оонньууларыгар 50-тан тахса тэрээһин култуурунай бырагыраама иһинэн бэс ыйын…