Киин куорат мээрэ суруналыыстары кытта көрсөр

Бу чааска Дьокуускай куорат мээрэ Евгений Григорьев суруналыыстары кытта көрсүһүүтэ буола турар.

Мээр сыл аайы көрсүһүүтүн уратытык ыытар. Быйылгы тэрээһини 5-с нүөмэрдээх Оҕо спортивнай оскуолатыгар ыытыллыбытынан сибээстээн да буолуо, физкултуура эрчиллиитин ыытан саҕалаата. «Өрүү хамнаабакка олорон суруйар үлэлээх дьоҥҥо бу маннык эрчиллии ордук туһалаах буолуо» диэн этэн туран, Евгений Григорьев суруналыыстарга эрчиллии хас да көрүҥүн оҥоттордо.
Ол кэнниттэн тута кэпсэтиини биэс сыллаах үлэтин ырытыыттан саҕалаата.

«Тыа сириттэн киин куоракка көһөн кэлии элбээбитинэн сибээстээн, оскуолалар туолан тураллар. Бу сыллар тухары 14 оскуола тутуллан үлэҕэ киирдэ» диэн бэлиэтээн туран, мээр сыыйа суол тутуутун, хомунаалынай хаһаайыстыба үлэтин сырдатта.
Биэс сыл иһигэр суол 85 бырыһыана өрөмүөннэммит. 14,5 км бэлисипиэтинэн айанныыр суолга тиийэ оҥоһулунна. «2022-2025 сылларга саҥа оптубустары ыллыбыт. Эбии атыыласпыт оптуобустарбыт бу күннэргэ айаннаан иһэллэр. 87 сылаас  тохтобул баар буолла. 161 түөлбэ-тиэргэни тупсаран оҥордубут. Хомунаалынай инфраструктураны саҥардыы чэрчитинэн канализация өрөмүөнэ тэтимнээхтик барда. Куораппытын көҕөрдүү үлэтэ күүскэ ыытыллар.
Биир сүрүн сорук — бэйдиэ сылдьар ыттары суох оҥорууга тустаах үлэни ыытыы.
Бу сылларга 12 255 ыт тутулунна, 6629 ыт аттанна (кастрировано), 8214 ыт вакцинацияны ааста. Элбэх оҕолоох дьиэ кэргэттэри сир учаастагынан хааччыйыыга үгүс өрүттээх үлэни ыыттыбыт. Чөл олоҕу тутуһууга улахан болҕомто ууруллар. Куоракка кэлиҥҥи сылларга 50 тыһыынча киһи успуордунан дьарыктанар буолла. Маныаха араас таһымнаах марафоннары, успуорт тэрээһиннэрин хаһааҥытааҕар да элбэхтик ыытарбыт үтүө көҕүлээһининэн буолла. Куораппытыгар үс саҥа Оҕо спортивнай оскуолата тутулунна. Уулуссаҕа успуордунан дьарыктаныы тэриллэринэн элбэх кыбартыыралаах дьиэ 60 тиэргэнин хааччыйдыбыт. Чөл олоҕу түстүүр үлэни ыытар буолан, арыгыны бохсуу үлэтин биэс сыл тухары күүскэ ыыттыбыт, —  диэн бэлиэтээтэ Евгений Григорьев.