Киин куорат нэһилиэнньэтин ахсаана 400 тыһыынчаны куоһарда

Кэнники биэс сыл иһигэр Дьокуускай куорат нэһилиэнньэтин ахсаана улаатта уонна прописката суох олорор гражданнары киллэрэн аахтахха, 400 тыһыынчаттан таҕыста.

Итини тэҥэ куорат бүддьүөтэ эмиэ үрдээтэ, ол олох хаачыстыбатын тупсарарга кыах биэрэр. Быһаарылла илик боппуруостар бааллар эрээри, сөптөөх үлэ ыытыллар. Бу туһунан Дьокуускай куорат баһылыга Евгений Григорьев «Россия 24» телеханаалга «Куораттыын быһа эпиир» биэрии кэмигэр эттэ.

«Кэнники биэс сыл иһигэр Дьокуускай куорат нэһилиэнньэтэ 30 тыһыынча кэриҥэ киһинэн элбээтэ, ол 8%-на буолар. Бүгүҥҥү күҥҥэ нэһилиэнньэ ахсаана официальнайдык 392 тыһыынча сыыппараҕа тиийдэ, оттон дьиҥинэн, прописката суох гражданнары киллэрэн тураниаахтахха, куоракка 400 тыһыынчаттан тахса киһи олороро биллэр», — диэтэ Евгений Григорьев.

Ити биэс сыл иһигэр куорат бүддьүөтэ 22 млрд солкуобайтан 37 млрд солкуобайга диэри улаатыннарда. Үүнүү 70% тэҥнэстэ. «Олохтоох бүддьүөттэн көрүллэр харчы кээмэйэ элбиир. Ол иһин биһиги эбии поликлиникалар уонна оскуолалар тутуллалларын көрөбүт. Бу, биллэн турар, өрөспүүбүлүкэ баһылыгын өйөбүлэ уонна  федеральнай бырайыактарга кыттыыта суох кыаллыа суох этэ», — диэн Евгений Григорьев бэлиэтээтэ.

Элбэх тутуу баарын үрдүнэн, куорат социальнай инфраструктуратын биир саамай кыһалҕатынан оскуолалар буолаллар. «Биэс сыл иһигэр ити хайысхаҕа ситиһиини оҥордубут. 14 эбийиэк тутулунна. Оскуолаларга миэстэ ахсаана 5,4 тыһыынчаттан тахсанан элбээтэ. Оҕо уһуйааннарыгар тыһыынчаттан тахса миэстэ оҥоһулунна. Ол ОГЭ уонна БКЭ түмүктэринэн кээмэйдэнэр үөрэхтээһин хаачыстыбатыгар үчүгэйдик дьайар — тупсуу үгэһэ баар. Ол да буоллар, боппуруос бүтүннүү быһаарылла илик, оскуолалар ноҕуруускалаах хаалаллар. Иннибитигэр маастар-былааҥҥа  улахан сорук турар: өссө 12 оскуоланы уонна 14 оҕо уһуйаанын тутуохтаахпыт», — диэн Дьокуускай куорат баһылыга иһитиннэрдэ.