Киин оройуоннарга өрүс суола барыллаан муус устар 15 күнүттэн сабыллара былааннанар

Муус устар 1 күнүттэн саҕалаан өрүс суолларыгар тырааныспар уйуга намтатылларын туһунан СӨ тырааныспарга уонна суол хаһаайыстыбатыгар министиэристибэтэ иһитиннэрэр. Итиэннэ барыллаан муус устар 15 күнүттэн киин оройуоннарга, оттон Арктикаҕа уонна хоту улуустарга муус устар 20-25 күннэригэр өрүс суоллара сабыллаллара былааннанар. 

СӨ тырааныспарга уонна суол хаһаайыстыбатыгар министиэристибэтэ кэлиҥҥи сылларга бэлиэтээбитинэн, өрүс суолунан тырааныспарга анаан ыйыллыбыт уйугу тутуспакка айан-сырыы элбээбит. Бу тиэхиньикэ муус анныгар барар кутталын үөскэтэр. Онон өрүс суолларынан куттала суох айаны хааччыйар сыалтан, министиэристибэ тырааныспар уйугун учуоттуурга уонна суол бэлиэлэрин тутуһарга ыҥырар.