«Киинэ бэстибээлин биир сүрүн тиэмэтэ — киһи уонна айылҕа»

Норуоттар икки ардыларынааҕы киинэ VIII бэстибээлэ Дьокуускайга үөрүүлээх быһыыга-майгыга арылынна.

Бэстибээл кыттыылаахтара Саха тыйаатырын таһынааҕы былаһааккаҕа «кыһыл дорожканан» хааман киириилэрэ биир кэрэ көстүүнэн  буолла. Манна саха көрөөччүлэрэ олус таптыыр уонна өссө да элбэҕи эрэнэ күүтэр режиссердара, бэстибээл киинэлэригэр оонньообут артыыстар бааллар.

Бэстибээл аһыллыытыгар кыттыбыт Саха сирин бырабыыталыстыбатын премьерэ Кирилл Бычков: «Бэстибээл ыытыллар сирэ ирэ-хоро кэпсэтэргэ олус үчүгэй былаһаакка. Норуоттар икки ардыларынааҕы бэстибээл буоларынан, бастатан туран,  кинематографистар уопуту атастаһалларыгар  кыах бэриллэр», – диэтэ.

Санатан эттэххэ, сүрүн куонкуруска киирсэр уон киинэттэн аҕыһа аан бастаан Саха сиригэр бэстибээлгэ көрдөрүллэр. Тэрийээччилэр этэллэринэн, бэстибээл сүрүн тиэмэтэ -– киһи айылҕаны кытары ситимэ.
Холобур, «Лучший игровой фильм» номинацияҕа 10 айар үлэ киирдэ. Арассыыйаттан Саха сирин режиссера Василий Слепцов «Сибэкки биэрээри» диэн киинэтэ кыттар.

Бэстибээли  тэрийээччи, «Сахафильм» дириэктэрэ Алексей Егоров:

«Норуоттар икки ардыларынааҕы бэстибээл саха киинэтэ сайдан иһэригэр, өссө туох эрэ саҥа суолу бэйэтигэр арыйарыгар тирэх буолуо диэн эрэнэбит. Араас дойдулартан, ол иһигэр Кытайтан, Грузияттан, Бурятияттан, Москваттан уо.д.а. бааллар.Ону таһынан киинэлэри устааччылар да географияалар киэҥ. Ол курдук, бу күннэргэ Эмиэрикэ, Италия, Иран, Индонезия, Бразилия, Непал, Беларусь, Франция режиссердарын киинэлэрин көрүөххэ сөп.

Бэстибээлгэ кэлбит дьон бары киинэ сайдарын туһугар үлэлии-хамсыы, туох эрэ улахан хамсааһыннары таһаара сылдьар дьон. Онон саха киинэтин сайдыытыгар күүс-көмө буолуохтара диэн салгыы бииргэ үлэлииргэ былааннанабыт», -– диэн бэстибээл аһыллыытыгар санаатын үллэһиннэ.

От ыйын 8 күнүгэр, бэстибээл сабыллыытыгар кыайыылаахтар кыһыл уонна үрүҥ көмүс хаар ачыкытын ылыахтара. 9 бирииһи сэргэ, көрөөччүлэр биһирэбиллэрин — саха киинэтигэр «бастыҥ киинэ» уонна «бастыҥ артыыс» номинацияҕа куоластааһын «Эдэр саас» саайтка ыытылла турар.

Куорат олохтоохторо уонна ыалдьыттара бүгүн маннык киинэлэри көрүөхтэрин сөп.

Куонкурус бырагыраамата

«Лена» тыйаатыр улахан саалатыгар:

16:00. «Мой друг  – нерпа» Бурятия Өрөспүүбүлүкэтэ, Арассыыйа,  6+

19:00. «Проклятые» (Италия). 18+

21:00. «Эндж” (Франция). 16+

Куонкуруһу таһынан бырагыраама

«Киин» тыйаатырга:

15:00. «Зимник», документальнай киинэ (Арассыыйа). 18+

«Лена» тыйаатыр дьоҕус саалатыгар:

16:30. «Мемориальные комплексы Беларуси-2”,  “Беларусь Өрөспүүбүлүкэтин киинэтэ” бырагыраама чэрчитинэн, Кыайыы 80 сылыгар аналлаах документальнай киинэ,  12+

«Синема центр» тыйаатырга:

17:00. «Легенды наших предков», 12+ Киинэни Иван Соснин уонна Яна Шмайлова билиһиннэрэллэр.

Лена» тыйаатыр дьоҕус саалатыгар: 18:00. «Время вернуться»,”Беларусь Өрөспүүбүлүкэтин киинэтэ” бырагыраама чэрчитинэн, Кыайыы 80 сылыгар байыаннай киинэ, 18+