Ахсынньы 28 күнүгэр өрөспүүбүлүкэ медиакиинигэр Саха сирин киинэ оҥорооччуларын өйүүргэ анаммыт өрөспүүбүлүкэ бүддьүөтүттэн көрүллэр көмө харчыны бырайыактарын көмүскээн кыайбыттарга субсидиялары туттарыы тэрээһинэ ааста.
Питчини ситиһиилээхтик ааспыт киинэ оҥорооччулар быйыл уопсайа 25 мөл.солк. харчыны бырайыактарын оҥоруутугар туттулар. Култуура миниистирин солбуйааччы Марина Силина урукку сыллар ситиһиилэрин кылгастык билиһиннэрдэ, Саха сирин киинэтэ ситиһиилээхтик сайда турарын туоһулуур кыайыыларын ахтан аһарда.
СӨ Бырабыыталыстыбатын бэрэссэдээтэлин солбуйааччы Сергей Местников ааспыт сылларга грант ылбыт киинэлэр үгүстэрэ быракаакка тахсыбыттарын туһунан кэпсээтэ, судаарыстыба өйөбүлүн ылбыт бырайыактар бары болдьоммут кэмнэригэр туттарыллыахтаахтарын санатта. “Сокуоммут этэринэн, билигин үп ылан баран үлэлэрин түмүктүү илик режиссердар, продюсердар саҥа питчиҥҥэ кыттар кыахтара суох, онон бырайыагы үмүрүтэн ситиһиилээхтик быракаакка таһааран баран саҥаттаан субсидияҕа кыттыаххытын сөп”, — диэн эттэ. Бүгүн эрдээҥҥи сыллар питчинг кыайыылаахтара сорохторо киэҥ экраҥҥа тахсыбыттар, сорохторо прокатнай дастабырыанньа туппуттар, сорох улахан бырайыактар ситэ оҥоруу түһүмэҕэр сылдьаллар эбит. Хойутаабыт, эстибит бырайыак суох.
Бу сыл кыайыылаахтара араас хайысхалаах үлэлэри көмүскээбиттэр:
Документалист-режиссер Иван Кривогорницын “Улуро Адо силигилиир туундаратын ырыалара” документальнай киинэ оҥоруутугар 978 тыһ.солк. үбү ылла
Киинэ режиссера Михаил Лукачевскай Дмитрий Коркин туһунан оҕолорго анаммыт уус-уран киинэ оҥороругар 4 мөл. 890 тыһ.солк. тутта.
Дебютант режиссер Сандал Баишев аатырбыт спортсменкабыт Настя Диодорова туһунан “Сүүрүк утары” диэн бырайыагын олоххо киллэрэригэр 5 мөл. 600 тыһ.солк. кэриҥэ судаарыстыба өйөбүлүн ылла.
ХЭТ “МультиДиТек” “Арассыыйа аптаах остуоруйалара” анимационнай лиэнтэлэрин оҥоруутугар 2 мөл. 655 тыһ.солк. көмө хары тутта.
Александр Лукин “Мэхээлэчээн булчут”сэһэҥҥэ олоҕуран устар киинэтигэр анаммыт 3 мөл. солк кэриҥэ үбү продюсера Юлия Бурнашева ылла.
“Тойон Кыыл” киинэни устубут Эдуард Новиков саҥа бырайыагын оҥоруутугар 7 мөл. кэриҥэ харчыны ылла.
Бырайыактары көмүскүүр питчины салайбыт Алексей Егоров-Өркөн: “Быйыл олус элбэх бырайыак киирдэ, хата тэрээһини сөптөөхтүк тэрийэммит, хамыыһыйа чилиэннэригэр үлэлэри эрдэ ыытаммыт бэрт дириҥ ырытыылаах, дьиҥ чахчы сөптөөх үлэ барда. Кэлэр сыл сонун, умсугутуулаах үлэлэри көрүөхпүт диэн бигэ эрэллээхпин”, — диэн санаатын үллэһиннэ.
«Чолбон» сурунаал балаҕан ыйынааҕы нүөмэригэр: - «Улуу Кыайыы айымньыларыгар» норуот суруйааччыта Николай Лугинов номоххо киирбит…
ИДьМ Тааттатааҕы салаатын дьуһуурунай чааһыгар, 83 саастаах аҕам саастаах киһиэхэ кимэ биллибэт киһи саба түспүтүн…
Саха Өрөспүүбүлүкэтин Судаарыстыбаннаһын күнүгэр, балаҕан ыйын 27 күнүгэр, 19:00 чаастан Ил Дархан Айсен Николаевы кытта…
Дьокуускайга ПСБ баан Саха Өрөспүүбүлүкэтигэр аан бастаан ыытыллыбыт “ЭтноРан.ЯКУТИЯ 2025” спортивнай-култуурунай сүүрүүнү өйөөн, тэрээһин анал…
ЫБММ пресс-сулууспата иһитиннэрбитинэн, балаҕан ыйын 17 күнүгэр түүн 02:13 ч. баһаарынай-быыһыыр сулууспаҕа Горнай улууһугар Аһыма…
Бүгүн, балаҕан ыйын 18 күнүгэр, куорат үрдүнэн быстах кэмҥэ өрөмүөн үлэтэ буоларынан сибээстээн, күн устата…