Киинэни оҥорооччу бырааба көмүскэллээх буолуохтаах

Бүгүн Дьокуускайга  арыллыбыт “Сыыппара Алмааһа” федеральнай IV пуорум чэрчитинэн “Интеллектуальная  собственность как драйвер креативной  и цифровой экономии. Фокус на ИТ и кинопроизводство” сиэссийэ үлэлээтэ.

Сиэссийэҕэ федеральнай салайааччылар, эспиэрдэр,  ИТ салаатын сүрүннүүр исписэлиистэрэ кытыннылар.

Сиэссийэ сүрүн тиэмэтинэн  инники иһэр технологиялары кытары уопуту атастаһыы, ИТ-эйгэҕэ бэйэ бородууксуйатын (ол иһигэр, киинэ индустриятын)  оҥорон баран, бэйэ быраабын сатаан  көмүскээһин,  сыыппаралаах инфраструктура сайдыытын нөҥүө стратегическай быһаарыылары ыларга холбоһуктаах үлэ боппуруостара  буоллулар.

Сиэссийэ кыттыылаахтара үксүлэрэ Дьокуускайга бу пуорумҥа иккистээн-үһүстээн кэлэллэрин,  Уһук Илиҥҥэ уонна Арассыыйаҕа сыыппаралаах технология инники кэскилин туһунан кэпсэтиигэ Саха сирин  сүрүн былаһаакканан буоларын  бэлиэтээтилэр.

Эспиэр Ирина Яковлева “ИТ продукт: разработать и заработать” иһитиннэриитигэр ИТ-бородууктаны оҥорор санаа киириититтэн саҕалаан, ону олоххо киллэрэргэ уонна салгыы сайыннарарга,  атыылыырга  туох ыарахаттары көрсүөххэ сөбүн туһунан кэпсээтэ.

Холобур, киинэ индустриятыгар саҥа киинэҕэ ааптар уонна киинэҕэ кыттыспыт үлэһиттэр (сценаристар, режиссердар, оператордар, муусука оҥорооччулар уо.д.а.)  бырааптарын көмүскээһин туһунан элбэҕи билиэххэ наадатын ыйда. Сүрүннээн киинэ эйгэтигэр айти-бородууктаны бэйэ бас билиитигэр хаалларыы процедуратын сатааһын, бэйэ быраабын сатаан көмүскээһин – бу дьоһун суолталаах боппуруос. Тоҕо диэтэххэ, ардыгар киһи бэйэтэ-бэйэтигэр үлэлиир эбэтэр үлэни биэрээччини кытары үлэлиир.

“Ханнык баҕарар саҥа бородууктаҕа бэйэ быраабын харыстааһын булгуччулаах. Тоҕо диэтэххэ, киинэ уустук бородуукта. Тугу эрэ сыыһа-халты оҥордоххутуна, содула элбэх буолуон сөп”, — диэн сүбэлээтэ.