Киирбит үбү байыаннай дьайыы пуондатыгар уктулар

Тоhуттар тымныылаах тохсунньу ыйы олуурдаах олунньу солбуйаатын, Ньурба улууһун үөрэҕин ситимигэр бэрт сэргэх тэрээhин буолан ааста. Ол курдук, хамсык хааччаҕын кэннэ, үгэс буолбут уhуйаан кэлэктииптэрин икки ардыгар ыытыллар күрэх сөргүтүлүннэ. Урукку өттүгэр хорунан ыллааhыҥҥа, театральнай туруорууга ыытыллыбыт буоллаҕына, бу сырыыга үҥкүүгэ буолан ааста.

Күрэххэ оройуон уhуйааннарын улахан аҥаардара кыттан, өрөбүл сарсыарда «Кыталык» култуура киинигэр көрөөччү да, кыттааччы да толору буолла.

Ыытааччылар Ньурба куорат «Аленушка» уонна  «Светлячок» оҕону сайыннарар киин-уhуйаан иитээччилэрэ Алена Лазарева, Елена Семенова «… саҕалыырбытын көҥүллээҥ» дииллэрин кытта, бииртэн биир бэрт сэргэх нүөмэрдэр тахсан истилэр. Кырдьык да, үҥкүү сырсыы күрэҕэ саҕаланан, сыанаҕа киhи эрэ кэрэхсии көрүөх кэрэ көстүүмнээх, сэгэйэ үөрбүт, истиҥник мичээрбит үҥкүүhүттэр сулбу-халбы ойо тэптилэр, муусукаҕа уйдара наскылдьыйа хаамтылар, тэтимнээхтик имитэ хамсаннылар.

Манна буолла өбүгэ алааhыттан силистэнэн-мутуктанан тахсар үлэhит бэрдин, нуучча норуотун киэҥ далай дууhатын, грузин, индус омук дьэрэкээн өҥнөөх омуннаах тэтимин, киис, саhыл баайдаах тамайа сиэлэр таба көлөлөөх хоту дойду хоhуун булчут дьонун ойуулуур бэртээхэй хамсаныылар, төрөөбүт дойду кэрэтин, оҕо аймах кутун тутар остуоруйатын, устан ааhар олох кэрэ кэмнэрин көрдөрөр бэртээхэй туруоруулар.

Күрэх икки бөлөҕүнэн буолла — бастакы бөлөххө биэс уонтан тахса, онтон иккискэ итинтэн аҕыйах ахсааннаах үлэhиттээх уhуйааннар киирдилэр. Онон бастакы бөлөххө 9, иккискэ 14 уhуйаан аат ааттаста. Ол эрэн бары олус кыhаллан, эппиэтинэстээхтик ылсан бэлэмнэнии, таҥас тиктии, киирии-тахсыы буолан кыттыбыттарын учуоттаан, дьүүллүүр сүбэ барыларгар анал ааты биэртэлээтэ. Оннук да буолумуна, үлэ быыhыгар ыктара, эбии эппиэтинэс сүгүү манан дьыала буолбатах буоллаҕа…

Түмүккэ кыайыылаахтарынан бастакы бөлөххө Маалыкайтан «Сардаҥа» уhуйаан, иккис Антоновкаттан «Ромашка», үhүс Ньурбаттан «Аленушка» оҕону сайыннарар кииннэр буоллулар. Иккис бөлөххө бастакы миэстэни Ньурбаттан «Кыталык», иккиhи «Туллукчаан» оҕону сайыннарар кииннэр, үсүhү Аканаттан оскуола уhуйаан салаата ыллылар. «Ураты көрүү», «Норуот бастыҥ үҥкүүтэ», «Истиҥ дууhалаах үҥкүү», «Кэрэ көстүү», «Бастыҥ ис хоhоонноох үҥкүү», «Сэргэх туруоруу», «ϴбүгэ үгэhин тутуhуу», «Кыайыыга дьулуур» анал ааттар хаhаайыннарын «буллулар».

Кэнсиэри бэркэ астына-дуоhуйа көрбүт бэтэрээннэрбит «Светлячок», «Сардаана», «Ромашка», «Туллукчаан», «Сардаҥа», Кыталык», «Улыбка» уһуйааннар сэбиэдиссэйдэрэ үҥкүүлэhэ сылдьалларыттан олус үөрэн, ытыстарын тыаhын харыстаабакка бэлэхтээтилэр.

       Кыттааччылар төлөбүр усунуостарын холбоон, кэнсиэртэн киирбит 75 500 солкуобайы байыаннай эпэрээссийэҕэ сылдьааччыларга көмө оройуоннааҕы пуондатыгар угуохтара. Онон биир сэргэх тэрээhин көдьүүhэ, суолтата өссө улаатан, үҥкүүhүттэрбитигэр, көрөөччүлэрбитигэр уонна тэрийээччилэргэ да биир үтүөнэн эргийэр үтүө дьыала эбилиннэҕэ. Олохпут отуора хамсаабатын, ырааҕы көрө, үйэлээҕи өйдүү, самныбат саргыны салайа, кэхтибэт кэскили кэҥэтэ туруоҕуҥ!

Венера Степанова,

«Кэнчээри» уhуйаан сэбиэдиссэйэ.