Килиэп иэс ылан баран төнүннэрбэтэх…

Алдан оройуоннааҕы ИДьМ салаатын силиэдэбэтэллэрэ уоруунан холуобунай дьыала силиэстийэтин түмүктээтилэр.

Томмот олохтооҕун дьиэтиттэн акустическай систиэмэни уорууга 38 саастаах киһи уорбаланарын быһаарбыттар.

Холуобунай дьыала матырыйаалларыгар сурулларынан, эмсэҕэлээччи бэкээринэҕэ үлэлиир киһиттэн уһун кэм устата хаста даҕаны иэс килиэп ыла сылдьыбыт. Ону бэкээринэ үлэһитэ бэйэтин тус харчытыттан төлөөн, атыылаһан биэрэр эбит. Иэс барыта холбоон 4800 солк. тэҥнэспит. Бэкээринэ үлэһитэ иэһин көрдөөбүтүгэр, анараа киһи билигин сатаан төлөһөр кыаҕым суох диэбит. Онуоха иэс суотугар аудиосистиэмэни биэр диэбитин, иэһээччи биэрбэтэх. Колонкалары сыанатыгар таһаардахха, быдан ыарахан буолар диэн.

Бэкээринэ үлэһитэ иэһээччи дьиэтин аадырыһын, кыбартыыратын аана хатамматын билэр буолан, сэрэппэккэ кэлэн акустическай систиэмэни уоран ылбыт. Салгыы ол систиэмэнэн бэйэтэ туһана сылдьыбытын полициялар былдьаабыттар.

Уоруунан холуобунай дьыала тэрилиннэ.