Килиэп кэмбинээтин үлэһитэ тиэстэ мэһийэр массыынаҕа тарбаҕын эрийтэрдэ

Дьокуускайга килиэп кэмбинээтин үлэһитэ эчэйиини ылбытын туһунан СӨ Үлэҕэ судаарыстыбаннай инспекцията иһитиннэрэр.

Дьахтар хаҥас илиитин тиэстэ мэһийэр массыынаҕа эрийтэрбит. Ол түмүгэр тарбахтарын эчэппит.

«Үлэһит бэчиэнньэ начыынын тиэстэ мэһийэр массыынаҕа булкуйбут, ол кэнниттэн араарбыт. Начыынын тобоҕун ыраастыы сырыттаҕына массыыната холбонон кэлэн, хаҥас илиитин эрийбит», — диэн иһитиннэриигэ суруллубут.

Дьахтар түөрт тарбаҕын улаханнык эчэппит, иниспиэктэрдэр эчэйиини ыарахан истиэпэннээх диэн быһаарбыттар. Итиэннэ дьахтар бастакы истиэпэннээх травматическай шок ылбыт.

Быһаарыллыбытынан, дьахтар бу үлэҕэ үөрэммэккэ уонна үлэ ирдэбилин билбэккэ сылдьыбыт.

Быһылаан тахсыбытыгар эппиэтинэстээх дьон билиннилэр.