Бастыҥ агроному быһаарыахтара

Өрөспүүбүлүкэҕэ аан бастаан Бүтүн Арассыыйатааҕы «Лучший по профессии» куонкурус «Агрономия» номинациятын эрэгийиэннээҕи түһүмэҕэ ыытылла турар.

Бу күрэскэ биэс агроном кытта сылдьар. Кыайыылаах, буоларын курдук, Саха сирин аатыттан федеральнай түһүмэххэ кыттыаҕа.

Бастакы күн теорияҕа анаммыт. Онтон иккис күҥҥэ, о.э. бүгүн, Хаҥалас улууһугар Өктөмҥө тахсаллар. Онно талан ылбыт идэлэригэр билиилэрин-көрүүлэрин, үлэлэригэр сатабылларын көрдөрөллөр.

Куонкурус экспертнэй сэбиэтин бэрэссэдээтэлэ, тыа хаһаайыстыбатын научнай-чинчийэр институтун дириэктэрэ Михаил Черосов күөн күрэс тэнийэн, кэҥээн иһиэҕин бэлиэтиир. Улуустартан кыттааччылары аныгыскы күрэскэ элбэтэр былааннаахтарын этэр.

Бүтүн Арассыыйатааҕы «Лучший по профессии» куонкурус «Агрономия» номинациятын федеральнай түһүмэҕэ быйыл от ыйыгар Мордовия Өрөспүүбүлүкэтигэр ыытыллар.

Сиһилии https://www.sakha.gov.ru/news/6284  манна көрүҥ.

СӨ Ил Дарханын уонна Бырабыыталыстыбатын пресс-сулууспата

Саргын Скрябин хаартыскаҕа түһэриитэ, ЯСИА