Ким биэнсийэтэ сэтинньиттэн үрдүүрүй?

Арассыыйа социальнай пуондата 2025 сыл сэтинньитигэр уочараттаах биэнсийэни хаттаан ааҕыытын ыытыаҕа.

Үрдээбит биэнсийэни 80-тан үөһэ саастаах кырдьаҕастар, I бөлөх инбэлииттэрэ, гражданскай авиация көтөр экипажтарын чилиэннэрэ, чох бырамыысыланнаһыгар үлэлиир дьон тутуохтара, диэн ТАСС-ка Госдуума дьоҕус уонна орто урбаан дьыалаларыгар кэмитиэтин чилиэнэ Алексей Говырин  (“Биир ньыгыл Арассыыйа” фракцията) кэпсээтэ.

«80 саастарын туолбут биэнсийэлээхтэр страховой биэнсийэлэрэ икки төгүлүнэн үрдүөҕэ. 2025 сыл саҕаланыыта биэнсийэ суумата 8907,70 солк. эбит буоллаҕына, икки төгүл элбээн 17815,40 солк. буолуоҕа. Маны таһынан, олунньуга 7,3%-нан индексацияламмыт 1314 солкуобай суумалаах көрүү-истии босуобуйата эбии көрүллэр. I бөлөх инбэлииттэригэр саастарыттан тутулуга суох эмиэ итинник быраабыла үлэлиэ: фиксированнай чааһа икки төгүл улаатар, ыйдааҕы толуйуута эмиэ оннук кээмэйинэн. Өскөтүн биэнсийэлээх киһи оройуоннааҕы коэффициеннаах эрэгийиэҥҥэ олорор буоллаҕына, бүтэһик суумата 1,15-1,9 төгүл үрдүүр. Ол түмүгэр, хотугу эрэгийиэн олохтооҕо 80 сааһын туолан баран, 10000 тахса солкуобайы эбии ылыан сөп», — диэн эттэ.

Көтөр экипаж уонна чох бырамыысыланнаһын үлэһиттэригэр хат ааҕыылар кыбартаал аайы оҥоһуллаллар — олунньуга, ыам ыйыгар, атырдьах ыйыгар уонна сэтинньигэ, диэн парламентарий эбэн эттэ. «Эбии төлөбүр буортулаах үлэттэн уонна анал үлэ ыстааһа төһөтүттэн тутулуктаах. Эр дьоҥҥо алын ыстаас 25 сыл, оттон дьахталларга — 20 сыл. Нуорманы аһарбыт хас биирдии сылын аайы ыйдааҕы орто хамнаһыттан көрөн 1% эбиллэр, ол эрээри урукку акылаатыттан 75-85%-тан элбэҕэ суох. 2025 сыл сэтинньитигэр 1,076 инфляция коэффициенын туһаныыттан сылтаан, хамнас бу категорияҕа 2-5% үрдүөҕэ. Хаттаан ааҕыы Кэлим судаарыстыбаннай социальнай страховка пуондатын (ЕГИССО) уонна үлэ киниискэтин дааннайдарыгар олоҕурар, эбии докумуоннар ирдэммэттэр. Ортотунан үрдээһин 1500-3000 солк. буолуоҕа”, — диэтэ Говырин.

Салгыы сыл саҕаланыаҕыттан федеральнай чэпчэтиилээхтэргэ ыйдааҕы харчы төлөбүрэ улаатта диэн парламентарий быһаарда. «9,5%-наах индексация ЕДВ орто кээмэйин 4191 солкуобайга тириэрдибитэ, оттон социальнай өҥөлөрү учуоттаан туран, 3580 солкуобайга тиийбитэ. Үлэлиир биэнсийэлээхтэр эмиэ 2025 сылтан саҕалаан страховой биэнсийэлэрин сыллааҕы индексацияларын ылыахтара. Биэнсийэҕэ тахсыбыттарын кэннэ, мунньуллубут индексациялара барыта автоматическайдык учуоттанар уонна төлөбүр ананар. СФР-га тиийэр наадата суох. Хаттаан ааҕыы түмүгэр биэнсийэ суумата биллэ улаатыан сөп, ордук киһи хас да сыл индексациялаппакка үлэлээбит буоллаҕына», — диэн быһаарда Говырин.

Арассыыйаҕа биэнсийэлээхтэргэ 2025 сылга тиийинэн олоруу алын кээмэйэ ортотунан 15 250 солк. диэн дьокутаат санатта. «Бу суумаҕа тиийбэт биэнсийэлээх дьоҥҥо федеральнай социальнай эбии төлөбүр ананар. Госөҥө порталыгар эбэтэр Арассыыйа социальнай пуондатын саайтыгар тус кэбиниэккэр киирэн, эбии төлөбүргүт сууматын бэрэбиэркэлиэххитин сөп. Саҥа ааҕыы механизма сайабылыанньаны биэриини ирдээбэт — бары дааннайдар СФР-га автоматически киирэллэр, ол көмөтүнэн эбии төлөбүрү хойутаабакка ааҕыахха сөп», — диэн түмүктээбитин ЯСИА аҕалар.