Ким университекка кэлэн эксээмэн туттарыан сөбүй?

“Биир кэлим эксээмэҥҥэ туттарсыахпын баҕарар үөрэхпэр ирдэнэр биридимиэттэн атыны талан кэбиспиппин. Университекка бэйэтигэр тиийэн эксээмэн туттарыахпын сөп дуо?”, – диэн биирдиилээн ыйытыылар киирэллэр.  

Биир кэлим эксээмэҥҥэ сайабылыанньаны быйыл олунньу 1 күнүгэр диэри туппуттара. Ол эрээри, сорохтор туттарсыахтарын баҕарар үөрэхтэригэр ханнык биридимиэттэргэ эксээмэннэр ирдэнэллэрин быраабылаҕа эрдэттэн көрбөккө хаалан, атын биридимиэттэри талан кэбиһэр түгэннэрэ баар.

Эксээмэни университекка бэйэтигэр тиийэн туттарар кыаллар дуо? Кимнээх туттарыахтарын сөбүй? Тустаах ыйытыыга М.К.Аммосов аатынан Хотугулуу-Илиҥҥи федеральнай университет киин тутар хамыыһыйатын исписэлиистэрэ маннык хоруйдаатылар:

—  Уопсай үөрэхтээһин биридимиэттэригэр үрдүк үөрэх бэйэтин тургутуутун (вступительные испытания вуза) орто анал үөрэхтээх дьон, доруобуйаларыгар хааччахтаах (инбэлиит) дьон, анал байыаннай дьайыы кыттыылаахтара, анал байыаннай дьайыы кыттыылаахтарын оҕолоро эрэ туттарыахтарын сөп. Мантан атыттар туттарар кыахтара суох.