Суолдьут сулус, үтүө өйдөбүл

Уус Алдан улууһугар С.С.Васильев-Борогонскай аатынан киин бибилэтиэкэ ааҕар саалатыгар «Түмэр, көҕүлүүр киһибит этэ…» диэн СӨ култууратын туйгуна, өр сылларга улуус култууратын тэрилтэлэригэр үтүө суобастаахтык үлэлээбит Гаврил Егорович Петуховка аналлаах кинигэ билиһиннэриитэ буолла.

Толору киһилээх саалаҕа Дьокуускайтан, Лөгөй сириттэн, улуус кииниттэн мустан кэлбит Гаврил Егорович бииргэ төрөөбүттэрэ, аймахтара, табаарыстара, биир идэлээхтэрэ, ыҥырыылаах ыалдьыттарбыт Арктикатааҕы эпос уонна ускуустуба кииниттэн, СӨ култууратын үтүөлээх үлэһитэ Саргылана Саввична Адамова , СӨ култуураҕа уонна духуобунай сайдыыга министиэристибэтиттэн Анна Степановна Готовцева кини туһунан истиҥник санаан-ахтан аастылар.

Дьокуускайга Дани-Алмаска 100 ахсаанынан тахсыбыт кинигэҕэ 56 ахтыы киирбит. Ахтыылар бииртэн биир солбуйсубуттар, бэйэ-бэйэлэрин ситэрсэн биэрбиттэр, хаартыскаларынан киэргэтиллибиттэр.

Кинигэни СӨ култууратын үтүөлээх үлэһитэ, култуура бэтэрээнэ М.З. Сивцева С.А. Бурцевалыын хомуйан таһаарбыттар. Кинигэ киирии тылыгар Мария Захаровна: «Орто дойдуга киһи буолан айыллан кэлбит барыта алтыспыт дьонугар туох-ханнык өйдөбүлү хаалларбытынан сыаналанар, үйэлэргэ умнуллубаттык хатанар», — диэн суруйар. Кырдьыга да оннук, Гаврил Егорович биһиги өйбүтүгэр-санаабытыгар барыбытыгар култуура эрэллээх байыаһын быһыытынан хаалыа.

Гаврил Егорович Петухов туһунан кинигэ кимиэхэ эрэ суолдьут сулус, кимиэхэ эрэ ааспат үтүө өйдөбүл буолуоҕа.

О. Павлова,

С.С.Васильев-Борогонскай аатынан киин бибилэтиэкэ отделын сэбиэдиссэйэ.

Хаартыскалар О.Павлова тиксэриилэрэ