«Кинигэ тыйаатырдарын» бэстибээлэ 11-с төгүлүн ыытылынна

«Книжки и маски» диэн ХI оҕо тыйаатыр кэлэктииптэрин бэстибээлэ уон биирис төгүлүн ыытылынна. Бэстибээл Кыайыы 80 сылыгар ананна.

Куорат бибилэтиэкэлэрэ бэйэлэрэ тыйаатырдаахтар диэн истибиккит дуо? Бибилэтиэкэ иһинэн үлэлиир оҕо тыйаатырдарын кэлэктииптэрэ «Кинигэ тыйаатыра» диэн ааттаахтар. 11 сыллааҕыта Наталья Владимировна Николаева бастакы «кинигэ тыйаатырын» арыйан, үлэлэппитэ. Ол кэмтэн ыла бибилэтиэкэлэргэ барыта 12 «кинигэ тыйаатыра» баар буолбута. Кырачаан ааҕааччыларын тыйаатыр, оонньуу нөҥүө кинигэни ааҕарга, ускуустубаны кэрэхсииргэ сыһыараллар.

Манна баҕалаах эрэ оҕолор дьарыктаналлар. Урут дьарыктаммыт оҕолортон сорохторо артыыс идэтигэр үөрэнэллэр, номнуо киинэҕэ, тыйаатырга оонньууллар. Тыйаатырга дьарыктаныы оҕолору сайыннарар, саҥарарга, туттарга-хаптарга, үҥкүүлүүргэ, арылларга көмөлөһөр.

Быйылгы бэстибээл Кыайыы 80 сылыгар анаммыт буолан, оҕолор Аҕа дойду сэриитин, Дьоруой оҕолор хорсун быһыыларын, Ленинград блокадатын, оҕотун сэриигэ сүтэрбит ийэни, сэрии кэмин оҕолорун, о.д.а. дьүһүйэн көрдөрдүлэр. Бэстибээл Култуура көҕүлээһиннэрин өйүүр бэрэсидьиэн пуондатын көмөтүнэн ыытыллар.

Барыта 11 «кинигэ тыйаатыра», 125 артыыс оҕо бэлэмнэнэн, долгуйа-долгуйа сыанаҕа тахсан, оонньоотулар. Саамай кыра кыттааччы 4 саастаах.Култуура, духуобунай сайдыы министиэристибэтин, Дьокуускай куорат дьаһалтатын, Бибилэтиэкэ кииннэммит ситимин бэрэстэбиитэллэрэ эҕэрдэлээтилэр.

Бэстибээл «Турук» этно-тыйаатыр иитиллээччилэрин туруорууларынан саҕаланна.

«Чук и гек» тыйаатыр — «Кукла», «Забава» — «Говорят погибшие герои», «Арлекино» — «Дети герои — маленькие воины великой страны», «Солнышко» — «Маленький скрипач», «Туесок сказок» — «Маленькие герои Ленинграда», «Простоквашино», «Апельсин» — «Имя Победы — советский народ!», «Без грима» — «Цветы бессмертия», «Умка» — «Баллада о матери», «Бэргээнчик» — «Дети войны», «Буратино» — «Сын полка», Бибилэтиэкэ кииннэммит ситимин үлэһиттэрэ «А зори здесь …» туруорууларын көрдөрдүлэр.